Ukraina kërkon 20 miliardë dollarë për të goditur më fort Rusinë

Ukraina po përgatitet t’u kërkojë aleatëve perëndimorë 20 miliardë dollarë shtesë ndihmë ushtarake, me synimin për të forcuar avantazhin e saj aktual në fushën e betejës dhe për të intensifikuar goditjet ndaj objektivave brenda territorit rus.

Sipas Politico, kërkesa pritet të paraqitet më 18 qershor gjatë takimit të ardhshëm të Grupit të Kontaktit për Mbrojtjen e Ukrainës në formatin “Ramstein”.

“Askush nuk e vë në dyshim se Rusia po digjet dhe ne duam që ajo të digjet edhe më fort, por për këtë na duhen fonde”, citohet të ketë thënë një zyrtar i lartë i Ministrisë së Mbrojtjes së Ukrainës.

Sipas burimeve të gazetës, çështja është diskutuar tashmë nga ministri ukrainas i Mbrojtjes, Mykhailo Fedorov, dhe zyrtarë të tjerë qeveritarë gjatë takimeve me përfaqësues të Norvegjisë, Suedisë, Gjermanisë dhe Kanadasë.

Kievi synon që fondet të sigurohen përmes kontributeve individuale nga aleatët, me shuma që do të variojnë nga 2 deri në 6 miliardë dollarë për secilin vend, në formën e ndihmës financiare ose kredive.

Mbështetja për Ukrainën pritet të jetë një nga temat kryesore edhe në samitin e ardhshëm të NATO-s, ku presidenti Volodymyr Zelensky do të zhvillojë takime me liderët e vendeve aleate.

Nëse fondet miratohen, ato do të përdoren për forcimin e mbrojtjes ajrore, blerjen e dronëve, municioneve, pajisjeve të luftës elektronike dhe armëve me rreze të gjatë veprimi.

Një pjesë e financimit do të shkojë gjithashtu për blerje direkte nga kompanitë ukrainase të industrisë së mbrojtjes dhe për zgjerimin e programeve prioritare të furnizimit ushtarak.