Trump tërheq një të tretën e avionëve luftarakë të NATO-s në Evropë

Administrata e presidentit të Shteteve të Bashkuara, Donald Trump, po përgatitet të reduktojë ndjeshëm forcat ajrore dhe detare që vendos në dispozicion të NATO-s në Evropë, në atë që konsiderohet si një nga ndryshimet më të mëdha në politikën amerikane të sigurisë ndaj kontinentit në dekada.

Sipas një raportimi të The New York Times, plani u është komunikuar aleatëve në fillim të qershorit përmes një dokumenti zyrtar dhe parashikon shkurtimin e një pjese të konsiderueshme të kapaciteteve ushtarake amerikane të dedikuara për mbrojtjen e Evropës.

Ndër masat kryesore përfshihet ulja e numrit të avionëve luftarakë F-16 dhe F-15E nga rreth 150 në 100, si dhe reduktimi i avionëve të zbulimit detar nga 26 në 15.

Po ashtu, Shtetet e Bashkuara planifikojnë të tërheqin të tetë avionët cisternë të furnizimit ajror që aktualisht janë në dispozicion të operacioneve evropiane.

Dokumenti parashikon gjithashtu zhvendosjen jashtë Evropës të një nëndetëseje të pajisur me raketa, një aeroplanmbajtëseje dhe disa anijeve luftarake që operojnë në kuadër të misioneve të saj.

Një tjetër ndryshim i rëndësishëm është largimi i njërit prej dy grupeve të bombarduesve strategjikë që deri tani konsideroheshin pjesë e mbrojtjes së Evropës.

Pentagoni nuk ka komentuar shifrat konkrete të raportuara, por Komanda Evropiane e SHBA-ve ka konfirmuar së fundmi se po shqyrton uljen e angazhimeve ushtarake amerikane në kontinent.

Sipas The New York Times, afati i zbatimit të planit pritet të jetë shumë më i shpejtë sesa kishin parashikuar vendet evropiane.

Ekspertët paralajmërojnë se reduktimet mund të ndikojnë në aftësinë e NATO-s për të monitoruar aktivitetet detare ruse, përfshirë lëvizjen e nëndetëseve, si dhe për të kryer goditje të thella me raketa Tomahawk në rast krizash të mëdha sigurie.

“Secila prej këtyre shkurtimeve mund të menaxhohet veçmas, por të marra së bashku ato përfaqësojnë një ndryshim të rëndësishëm strategjik dhe krijojnë sfida për aftësinë parandaluese të Evropës”, tha Giuseppe Spatafora nga Instituti i Bashkimit Evropian për Studime të Sigurisë.

Trump ka kritikuar prej vitesh aleatët evropianë për varësinë e tyre nga mbrojtja amerikane dhe ka kërkuar vazhdimisht që vendet evropiane të investojnë më shumë në sigurinë e tyre.

Megjithatë, raporti thekson se ndikimi i reduktimeve do të zbutet pjesërisht nga fakti se SHBA do të mbetet ende një nga kontribuuesit më të mëdhenj ushtarakë në NATO, ndërsa vendet evropiane kanë nisur tashmë programe të gjera riarmatosjeje për të reduktuar varësinë nga Washingtoni.