Xi Jinping i tha Trumpit se Putin mund të “pendohet” për pushtimin e Ukrainës
Presidenti kinez Xi Jinping i ka thënë homologut amerikan, Donald Trump, gjatë takimit të tyre në Pekin javën e kaluar, se Vladimir Putin mund të përfundojë duke u “penduar” për pushtimin e Ukrainës në vitin 2022.
Sipas burimeve të njohura me vlerësimin amerikan të samitit dhe të cituara nga Financial Times, komentet e liderit kinez u bënë gjatë bisedimeve të gjera që prekën luftën në Ukrainë, marrëdhëniet globale dhe rolin e institucioneve ndërkombëtare.
Raportohet se Trump propozoi gjithashtu që SHBA-të, Kina dhe Rusia të bashkëpunojnë kundër Gjykatës Ndërkombëtare Penale, duke argumentuar se tre fuqitë kanë interesa të përbashkëta ndaj saj.
Komentet e Xi-së konsiderohen domethënëse, pasi Pekini tradicionalisht ka shmangur kritikat direkte ndaj Putinit. Sipas burimeve, gjatë bisedimeve të mëparshme me ish-presidentin Joe Biden, Xi kishte diskutuar luftën në Ukrainë, por nuk kishte dhënë vlerësime personale për vendimin e Putinit.
Zbulimi vjen në një moment simbolik, pasi Putin pritet të mbërrijë në Kinë këtë javë për një tjetër samit me Xi Jinping, vetëm pak ditë pas vizitës së Trump në Pekin. Vizita përkon edhe me 25-vjetorin e traktatit të miqësisë kino-ruse të nënshkruar nga ish-presidenti kinez Jiang Zemin dhe Putini.
Lufta në Ukrainë ka hyrë tashmë në vitin e pestë dhe shihet gjerësisht si një konflikt i ngrirë, ku sulmet me dronë janë bërë elementi më transformues i luftës moderne. Administrata amerikane ka akuzuar vazhdimisht Kinën për furnizim të Rusisë me mallra “dual-use”, që mund të përdoren si për qëllime civile ashtu edhe ushtarake.
Ndërkohë, presidenti ukrainas Volodymyr Zelensky deklaroi se sulmet ukrainase me dronë pranë Moskës ishin “plotësisht të justifikuara”, pas një vale të re bombardimesh ruse mbi Kievin.
Komentet e Xi Jinping mund të interpretohen si një sinjal i rrallë se edhe Pekini po e sheh luftën e Putinit si një barrë strategjike afatgjatë për Rusinë dhe stabilitetin global.