Qyteti kyç për kontrollin e Donbasit rrezikon të bjerë
Forcat ruse kanë intensifikuar ofensivën e tyre ndaj qytetit strategjik të Kostjantinivkës në lindje të Ukrainës, një pikë kyçe për kontrollin e rajonit të Donbasit.
Sipas ushtarëve ukrainas të cituar nga BBC, qyteti është shndërruar praktikisht në një “zonë gri”, ku asnjëra palë nuk ka kontroll të plotë.
Ushtarë ukrainas në terren raportojnë se trupat ruse kanë depërtuar në disa zona të qytetit dhe po përpiqen ta rrethojnë atë nga disa drejtime.
Kostjantinivka konsiderohet porta hyrëse drejt qyteteve Kramatorsk dhe Sloviansk, bastionet e fundit të Ukrainës në Donbas.
Autoritetet ruse pretendojnë se njësitë e tyre po avancojnë me shpejtësi dhe kanë rrethuar forcat ukrainase në pjesë të qytetit. Këto pretendime mohohen nga Kievi.
Komandanti i Korpusit të 19-të të Ukrainës, gjeneral brigade Oleksandr Bakulin, deklaroi se situata mbetet nën kontroll dhe se armiku nuk ka arritur suksese vendimtare, megjithëse pranoi se rreth 130 ushtarë rusë ndodhen ende brenda qytetit.
Sipas oficerëve ukrainas, luftimet zhvillohen shtëpi më shtëpi, ndërsa ndërtesat dhe pemët u ofrojnë strehim forcave ruse për t’u fshehur nga dronët ukrainas. Në të njëjtën kohë, dronët rusë po godasin pozicionet dhe bazat e lëshimit të dronëve ukrainas, duke vështirësuar mbrojtjen e qytetit.
Një pilot droni ukrainas e cilësoi situatën si një “krizë të madhe”, duke paralajmëruar se mungesa e personelit dhe e përforcimeve po e bën gjithnjë e më të vështirë mbajtjen e linjave të frontit. Ai tha se forcat ruse po avancojnë gradualisht, ndonjëherë vetëm disa dhjetëra metra në ditë, por pa ndërprerje.
Ekspertët ushtarakë vlerësojnë se nëse Kostjantinivka bie, Rusia do të ketë mundësi të avancojë drejt Kramatorskut dhe Slovianskut, duke iu afruar objektivit strategjik të Kremlinit për marrjen e plotë të rajonit të Donbasit.
Ndërkohë, Ukraina ka vazhduar sulmet ndaj rafinerive të naftës dhe linjave të furnizimit ruse, përfshirë ato që lidhin Rusinë me Krimenë e pushtuar, duke shkaktuar mungesa karburanti në disa zona. Megjithatë, zhvillimet në Kostjantinivka tregojnë se fronti lindor mbetet një nga pikat më të nxehta të luftës.