Një guru në prapaskenë? Qindra memo sekrete për Tulsi Gabbard
Një investigim i Washington Post ka hedhur dritë mbi një rrjet komunikimi të panjohur më parë, duke publikuar qindra memo konfidenciale që, sipas gazetës amerikane, sugjerojnë se karriera politike e Tulsi Gabbard është ndikuar për vite me radhë nga guruja hindu Chris Butler dhe rrethi i tij i ngushtë.
Sipas investigimit, dokumentet përmbajnë udhëzime të detajuara për qëndrimet politike, strategjitë elektorale, komunikimin publik dhe vendimmarrjen e Gabbard gjatë periudhës kur ajo shërbeu si anëtare e Kongresit amerikan.
Washington Post shkruan se siguroi qindra memo të brendshme dhe më pas zhvilloi një hetim për të identifikuar autorët e tyre dhe mënyrën se si ato i dërgoheshin ish-kongresmenes.
Sipas gazetës, shumë prej dokumenteve mbanin udhëzime konkrete mbi çështje të politikës së jashtme, votimet në Kongres, deklaratat publike dhe menaxhimin e imazhit politik, duke krijuar përshtypjen e një sistemi të organizuar këshillimi që vepronte jashtë strukturave zyrtare.
Në qendër të investigimit ndodhet Chris Butler, një figurë fetare dhe themelues i një lëvizjeje shpirtërore me bazë në Havai, i cili prej dekadash konsiderohet mentor i familjes së Gabbard.
Edhe pse lidhja personale mes tyre ka qenë e njohur publikisht, investigimi ngre pikëpyetje nëse ndikimi i Butler ka shkuar përtej aspektit shpirtëror dhe ka prekur drejtpërdrejt vendimmarrjen politike të ish-kongresmenes.
Washington Post thekson se memoja përfshijnë rekomandime për tema të ndjeshme si politika e jashtme amerikane, marrëdhëniet me Indinë, çështje sociale dhe strategjitë elektorale, ndërsa disa prej tyre përmbajnë edhe formulime që ngjajnë me udhëzime të drejtpërdrejta për deklaratat publike.
Gabbard ka mohuar vazhdimisht se vendimet e saj politike janë diktuar nga Butler apo ndonjë organizatë fetare, duke këmbëngulur se ai ka qenë vetëm një udhërrëfyes shpirtëror dhe mik i familjes.
Megjithatë, sipas Washington Post, numri i madh i dokumenteve dhe përmbajtja e tyre ngrenë dyshime të reja mbi shkallën e ndikimit që ky rrjet ka ushtruar në formësimin e karrierës së saj politike.