Irani godet bazat ajrore izraelite, Garda Revolucionare: Gati për operacione në të gjitha frontet
Garda Revolucionare e Iranit (IRGC) deklaroi se ka ndërmarrë sulme kundër bazave ajrore izraelite Nevatim dhe Tel Nof, si përgjigje ndaj goditjeve izraelite mbi radarët ushtarakë brenda territorit iranian.
Sipas agjencisë iraniane Fars, IRGC-ja tha se është “gati për çdo skenar dhe për operacione të gjera në të gjitha frontet”, duke sinjalizuar mundësinë e një përshkallëzimi të mëtejshëm të konfliktit.
Ndërkohë, televizioni shtetëror iranian raportoi për shpërthime në Isfahan, Karaj, Tabriz dhe Teheran, pasi Izraeli nisi sulme ajrore në Iranin qendror dhe perëndimor në përgjigje të breshërive të raketave të lëshuara nga Teherani.
Një dëshmitar në kryeqytetin iranian tha se kishte dëgjuar të paktën një shpërthim të fuqishëm në perëndim të Teheranit. Pas sulmeve, Irani mbylli hapësirën ajrore përreth Aeroportit Ndërkombëtar “Imam Khomeini”, aeroportit kryesor të vendit.
Forcat Ajrore Izraelite konfirmuan se kishin goditur objektiva ushtarake në Iranin perëndimor dhe qendror. Mediat iraniane raportuan gjithashtu shpërthime në Teheran, Tabriz dhe Isfahan.
Përplasjet e fundit pasuan disa breshëri raketash të lëshuara drejt Izraelit të dielën në mbrëmje, pas një sulmi izraelit në Bejrut më herët gjatë ditës.
Në anën diplomatike, kryeministri i Katarit, Sheikh Mohammed bin Abdulrahman Al Thani, zhvilloi një bisedë me ministrin e Jashtëm iranian Abbas Araghchi për përpjekjet ndërmjetësuese mes Shteteve të Bashkuara dhe Iranit, si dhe për zhvillimet në Liban.
Sipas Ministrisë së Jashtme të Katarit, dy zyrtarët diskutuan kanalet e vazhdueshme të ndërmjetësimit mes Washington-it dhe Teheranit, megjithëse deklarata nuk përmendi drejtpërdrejt përplasjet më të fundit mes Iranit dhe Izraelit.
Ndërkohë, kryeministri izraelit Benjamin Netanyahu nuk ka dalë ende me një deklaratë publike për përshkallëzimin e ri të konfliktit.
Deri tani, përditësimet zyrtare për publikun janë dhënë kryesisht nga zëdhënësi i Forcave të Mbrojtjes së Izraelit (IDF), ndërsa zyra e kryeministrit ka kufizuar komentet e saj në njoftime të veçanta.
Në sfondin e tensioneve, presidenti i Shteteve të Bashkuara, Donald Trump, raportohet se i kishte kërkuar Netanyahut të mos kundërpërgjigjej ndaj Teheranit.
“Jemi shumë pranë një marrëveshjeje përfundimtare me Iranin. Do të jetë një marrëveshje e mirë. Nuk dua që ajo të dështojë për shkak të asaj që po ndodh tani”, citohet të ketë thënë Trump për Axios.