Eni Vasili, qindra milionë për një logo të vjedhur dhe një skenografi emisioni

Radio Televizioni Shqiptar është rikthyer në qendër të debatit publik për mënyrën se si po përdoren fondet e institucionit, pas prezantimit të identitetit të ri vizual dhe ndryshimeve të sezonit të ri televiziv.

RTSH prezantoi më 16 shtator logon dhe identitetin e ri vizual, duke e cilësuar këtë si pjesë të një pakete më të gjerë modernizimi të institucionit. Sipas RTSH-së, identiteti i ri synon të krijojë një pamje më moderne dhe të unifikuar në kanalet televizive dhe platformat digjitale.

Por kostoja e këtij projekti ka hapur diskutime. Shifra prej rreth 86 mijë eurosh është bërë pjesë e debatit publik, ndërsa verifikimet e publikuara së fundmi tregojnë se kjo shumë nuk duhet paraqitur si pagesë vetëm për një logo.

Dhe ç’të shohim?! Logoja është një kopje identike, ku ndryshon vetëm ngjyra, me logon e ZDF-së.

Nga ana tjetër, në dokumentin që disponon ‘Pamfleti’, shohim preventivin e një emisioni mëngjesi (ndërkohë që nuk janë paguar emisionet e tjera të jashtme dhe taksapaguesit janë ‘grirë nga lekët’ duke paguar për arbitrazhet që humbet RTSH-ja).

Vetëm për skenografinë e këtij emisioni mëngjesi janë shpenzuar mbi 110 milionë lekë. Do kishte shkuar më lirë skenografia e Festivalit në Pallatin e Kongreseve.

Debati bëhet edhe më i rëndësishëm për shkak të vetë natyrës së RTSH-së. Bëhet fjalë për transmetuesin publik, i cili financohet edhe përmes tarifës së aparatit dhe mbështetjes buxhetore. Në dokumentet financiare të RTSH-së, institucioni ka evidentuar nevojën për kontroll të shpenzimeve dhe vështirësi në realizimin e të ardhurave.

Ndërkohë, RTSH ka argumentuar se për vitin 2026 ka nevojë për investime në teknologji, transmetime, platformën OTT, kapacitete profesionale dhe projekte të tjera modernizimi.

Kjo e zhvendos debatin përtej një logoje të re apo një studioje televizive.