Edi Rama kërkon ndihmë nga lobi grek në SHBA
Edi Rama niset sot drejt Shteteve të Bashkuara të Amerikës me një plan të përgatitur me kujdes, por me pritshmëri mjaft pesimiste për të.
Siç mësohet, Rama ka kërkuar një takim në Departamentin e Shtetit, por deri tani nuk ka marrë përgjigje pozitive. Mesazhe jooptimiste kanë ardhur edhe për mundësinë e një takimi me Jared Kushnerin ose Ivanka Trumpin në margjinat e Asamblesë së Përgjithshme të OKB-së.
I gjendur në një situatë të vështirë në marrëdhëniet me Uashingtonin, Edi Rama ka kryer një lëvizje pindarike, e cila për një lojtar cirku si ai nuk përbën ndonjë vështirësi.
Sipas informacioneve, kryeministri i është afruar lobit të fuqishëm grek në SHBA, i cili ka lidhje me administratën amerikane.
Për këtë lëvizje ka përdorur Vangjel Tavon, i cili, që kur Rama e solli si kryetar të Bashkisë së Himarës, ka shërbyer edhe si negociator me lobin grek në SHBA. Kryeministri e ka përdorur Tavon si ndërmjetës me Qirjako Micotaqisin dhe, veçanërisht, me lobin greko-himariot në Amerikë.
Zëra të ndryshëm thonë se në Himarë është hapur një portë për investime dhe se vendimet përkatëse janë marrë ose po përgatiten.
Në këtë linjë shërbeu si katalizator edhe pelegrinazhi i Ramës në Malin Athos, megjithëse duhet thënë se ai lidhej kryesisht me një çështje shpirtërore, për shkak të gjendjes shëndetësore të djalit të tij të madh.
Suksesi kryesor për kreun e qeverisë gjatë vizitës në SHBA do të ishte një takim me Marco Rubion ose Donald Trumpin. Rama e ka të siguruar mundësinë e një fotografie me presidentin amerikan gjatë pritjes tradicionale me udhëheqësit botërorë.
Ndërkohë, kryeministri ka angazhuar Tony Blairin për të siguruar një takim personal me Donald Trumpin, të shoqëruar edhe me qëndrime ose deklarata publike prej tij. Deri tani nuk ka asnjë konfirmim për një takim të tillë.
Rama e konsideron qëndrimin në Nju Jork edhe si një mundësi për të zhvilluar kontakte politike me udhëheqësit europianë, të cilët kohët e fundit janë distancuar prej tij.
Sipas informacioneve, deri tani është siguruar një takim me Qirjako Micotaqisin. Kjo ul mundësinë e një takimi me Rexhep Tajip Erdoganin dhe përbën një sinjal të qartë politik.
Interesi kryesor i Edi Ramës duket se lidhet me sigurimin e një takimi me kancelarin gjerman Friedrich Merz, në periudhën më të vështirë politike për kryeministrin shqiptar. Rama synon ta përdorë këtë takim si kundërpeshë ndaj Flamingove në protestë.
Mësohet se Rama do të marrë pjesë edhe në forumin e organizuar nga Clintonët në margjinat e Asamblesë së Përgjithshme të OKB-së, me shpresën se do të krijojë kontakte me krahun liberal të politikës amerikane dhe do të përforcojë sinjalin e tij ndaj Flamingove.