Donald Trump në delir pas akordit me Iranin: Nuk ka kufij për pushtetin tim
Presidenti amerikan Donald Trump ka deklaruar se lufta me Iranin nuk zbuloi kufijtë e fuqisë së tij politike apo ushtarake, duke këmbëngulur se vazhdon të besojë se “nuk ka kufij” për pushtetin që mund të ushtrojë.
Në një intervistë për emisionin “The Axios Show”, Trump hodhi poshtë pretendimet se marrëveshja e arritur me Iranin ishte një tërheqje nga objektivi fillestar i “dorëzimit pa kushte” të Teheranit.
“Ende nuk e kam mësuar atë mësim. E di që ka kufij, por nuk ka kufij”, tha Trump, duke argumentuar se SHBA-të arritën një fitore të plotë ushtarake ndaj Iranit.
Presidenti amerikan shkoi më tej duke pretenduar se një memorandum mirëkuptimi i nënshkruar mes dy vendeve “ndoshta është dorëzim pa kushte”, ndërsa theksoi se lufta dëshmoi superioritetin ushtarak amerikan.
“Ne i mposhtëm plotësisht ushtarakisht. Kush tjetër mund të bënte një bllokadë të tillë? Vendosa një bllokadë detare ku asnjë anije nuk mund të kalonte. Disa provuan, por nuk zgjati shumë”, deklaroi ai.
Megjithatë, Trump pranoi se vendimi për të negociuar me Iranin u ndikua nga frika e pasojave ekonomike globale. Sipas tij, vazhdimi i bombardimeve do ta mbante të mbyllur Ngushticën e Hormuzit, rruga më e rëndësishme detare për transportin e naftës në botë.
“E vetmja mënyrë për të qenë më i ashpër do të ishte të vazhdoja bombardimet për dy ose tre javë të tjera. Por çfarë do të fitonim? Hormuzi nuk do të hapej. Nuk do të kishim naftë për muaj të tërë”, tha ai.
Trump paralajmëroi se një situatë e tillë mund të kishte shkaktuar një krizë ekonomike globale.
“Ky është lloji i situatës që mund të shkaktojë një depresion botëror”, u shpreh presidenti amerikan.
Burime pranë administratës amerikane kanë bërë të ditur se Trump kishte shprehur shqetësime në mënyrë private për pakësimin e rezervave globale të naftës dhe rrezikun e një tronditjeje të madhe energjetike nëse Ngushtica e Hormuzit do të mbetej e bllokuar.
Deklaratat e tij hedhin dritë mbi arsyet që e shtynë Shtëpinë e Bardhë të pranonte një marrëveshje më të kufizuar me Iranin, në vend të objektivave maksimaliste të shpallura në fillim të konfliktit. Megjithatë, Trump këmbëngul se rezultati nuk tregon kufizimet e fuqisë së tij, por përkundrazi shtrirjen e saj.