Turqia zbulon armën e saj vdekjeprurëse

Turqia ka prezantuar një armë të re precize, të ngjashme me variantin sekret amerikan AGM-114R9X “Hellfire”, i njohur ndryshe si “Flying Ginsu”, për shkak të teheve metalike që hapen pak para goditjes së objektivit.

Arma e re turke quhet “Neşter” – që në turqisht nënkupton “bisturi” – dhe u prezantua nga kompania Roketsan gjatë panairit ndërkombëtar të mbrojtjes dhe hapësirës ajrore SAHA 2026 në Stamboll.

Ndryshe nga raketat tradicionale, “Neşter” nuk përdor kokë shpërthyese. Në vend të saj, ajo pajiset me gjashtë tehe metalike që hapen menjëherë para goditjes, duke synuar eliminimin e objektivave specifikë me dëme minimale anësore.

Sipas ekspertëve, raketa është projektuar posaçërisht për sulme precize dhe operacione eliminimi.

“Neşter” bazohet mbi municionin inteligjent MAM-L, i cili përdoret gjerësisht nga droni turk Bayraktar TB2. Ky dron është përdorur në konflikte të ndryshme, përfshirë Siri, Libi, Ukrainë dhe konfliktin mes Armenisë dhe Azerbajxhanit.

Sipas prodhuesit, arma e re mund të integrohet lehtësisht në dronë, avionë të lehtë sulmues dhe potencialisht edhe në helikopterë si T129 ATAK.