Shpenzimet e luftës së SHBA-ve në Iran mund të kishin shpëtuar 87 milionë jetë
Shpenzimet prej rreth 2 miliardë dollarësh në javë që Shtetet e Bashkuara të Amerikës po i dedikon luftës në Iran mund të kishin financuar shpëtimin e më shumë se 87 milionë jetëve, ka deklaruar drejtuesi i ndihmës humanitare në Kombeve të Bashkuara, Tom Fletcher.
Duke folur në Chatham House në Londër, Fletcher theksoi se kostoja e konfliktit është jashtëzakonisht e lartë krahasuar me nevojat humanitare globale. Ai shpjegoi se një plan prioritar i OKB-së për të shpëtuar 87 milionë njerëz kërkon rreth 23 miliardë dollarë – një shumë që mund të ishte siguruar në më pak se dy javë shpenzimesh lufte.
Fletcher paralajmëroi gjithashtu për rrezikun e normalizimit të gjuhës së dhunshme në politikën ndërkombëtare, duke iu referuar deklaratave të presidentit Donald Trump për “bombardimin e Iranit deri në epokën e gurit”.
Sipas tij, kjo lloj retorike mund të inkurajojë liderë të tjerë autoritarë të përdorin taktika të ngjashme dhe të shënjestrojnë civilët dhe infrastrukturën civile, në kundërshtim me të drejtën ndërkombëtare.
Ai theksoi se kriza e financimit humanitar është përkeqësuar ndjeshëm, me një ulje rreth 50% të buxhetit të tij, duke e cilësuar situatën si “katastrofike”.
Këto shkurtime nuk vijnë vetëm nga SHBA, por edhe nga vende të tjera që kanë reduktuar ndihmat e jashtme për shkak të prioriteteve të reja buxhetore dhe presionit për rritjen e shpenzimeve ushtarake.
Sipas Fletcher, lufta në Iran po ka pasoja globale, duke nxitur rritjen e çmimeve të ushqimeve dhe karburanteve dhe duke rrezikuar të shtyjë më shumë njerëz drejt varfërisë, veçanërisht në rajone si Afrika Sub-Sahariane.
Ai kritikoi gjithashtu klimën politike ndërkombëtare, duke theksuar se Këshilli i Sigurimit i OKB-së është thellësisht i polarizuar dhe gjithnjë e më pak efektiv në ruajtjen e paqes globale.
Fletcher ngriti shqetësime edhe për sigurinë e punonjësve humanitarë, duke theksuar se mbi 1,000 prej tyre janë vrarë në tre vitet e fundit. Ai bëri thirrje për më shumë përgjegjësi ndaj atyre që sulmojnë punonjësit e ndihmës, duke kërkuar veprime konkrete nga komuniteti ndërkombëtar.
Në fund, ai theksoi dilemat etike me të cilat përballet OKB-ja, përfshirë nëse duhet të pranojë fonde nga SHBA nëse ato shoqërohen me kushte politike, duke vënë në dukje tensionin mes shpëtimit të jetëve dhe ruajtjes së parimeve humanitare.