SHBA godet dy varka iraniane pasi tentuan të kapnin një dron të Marinës në ngushticën e Hormuzit

Forcat amerikane kanë shkatërruar dy varka të vogla iraniane në ngushticën e Hormuzit, pasi pjesëtarë të Gardës Revolucionare Islamike të Iranit (IRGC) tentuan të merrnin kontrollin e një droni të Marinës amerikane, bëjnë me dije zyrtarë amerikanë për Axios.

Incidenti ndodhi të hënën, në një zonë pranë ishullit Larak dhe qytetit port Kargan, në provincën Hormozgan të Iranit.

Sipas një zyrtari amerikan, varkat iraniane u përdorën nga IRGC për të tentuar kapjen e një mjeti lundrues pa ekuipazh të përdorur nga ushtria amerikane për patrullimin e ngushticës strategjike.

Pasi identifikuan përpjekjen, forcat amerikane ndërhynë. Një dron amerikan lëshoi dy raketa ndaj varkave, duke i shkatërruar ato dhe duke shkaktuar viktima në mesin e personave që ndodheshin në bord.

Komanda Qendrore e SHBA-ve (CENTCOM) konfirmoi incidentin, duke deklaruar se varkat iraniane tentuan të merrnin kontrollin e një mjeti lundrues amerikan pa ekuipazh, por nuk ia dolën pas reagimit të forcave amerikane.

“Anija sipërfaqësore pa ekuipazh mbetet nën kontrollin operacional të SHBA-ve”, deklaroi zëdhënësi i CENTCOM, kapiteni Tim Hawkins.

Irani raportoi sulm ndaj varkave të peshkimit

Ushtria amerikane fillimisht nuk bëri publik informacionin për sulmin.

Ndërkohë, mediat iraniane raportuan se dy varka peshkimi ishin goditur pranë Karganit dhe ishullit Larak. Zëvendësguvernatori i provincës Hormozgan për çështjet e sigurisë, Ahmad Nafisi, ia atribuoi sulmin ushtrisë amerikane.

Sipas agjencisë gjysmëzyrtare iraniane Mehr News, një numër i paqartë peshkatarësh rezultojnë të zhdukur dhe ekipet e kërkim-shpëtimit kanë nisur operacionet për gjetjen e tyre.

Përplasja vjen në një moment kritik për trafikun detar

Incidenti është një tregues i ri i tensioneve mes SHBA-ve dhe Iranit, ndërsa Washingtoni po përpiqet të rikthejë trafikun tregtar në nivele më të larta në ngushticën e Hormuzit.

Sipas zyrtarëve amerikanë, anijet tregtare dhe cisternat kanë nisur të kryejnë kalime gjatë ditës nën shoqërimin dhe mbrojtjen e forcave amerikane dhe vendeve të Gjirit, jo vetëm gjatë natës.

Në të njëjtën kohë, Arabia Saudite ka rritur ndjeshëm numrin e cisternave të naftës që kalojnë përmes ngushticës, ndërsa përshkallëzimi i luftimeve me rebelët Houthi në Detin e Kuq ka ndikuar në rrugët alternative të transportit.

Forcat amerikane kanë zgjeruar gjithashtu zonat e kanalit qendror të ngushticës që janë pastruar nga minat.

Rreth 40 anije kalojnë çdo ditë

Një zyrtar amerikan tha se aktualisht rreth 40 anije kalojnë çdo ditë në ngushticën e Hormuzit nën udhëzimin dhe mbrojtjen e ushtrisë amerikane.

Nëpërmjet kësaj rruge ujore transportohen rreth 14 milionë fuçi naftë në ditë. Gjatë javës së fundit, nëpër ngushticë kanë kaluar gjithashtu disa cisterna që transportonin gaz natyror të lëngshëm (LNG) dhe gaz të lëngshëm të naftës (LPG).

Ngushtica e Hormuzit mbetet një nga pikat më strategjike të tregtisë globale të energjisë dhe çdo përshkallëzim ushtarak në këtë zonë mund të ketë pasoja të drejtpërdrejta për sigurinë e transportit detar dhe tregjet ndërkombëtare të energjisë.