Protesta e flamingove ka hyrë në fazën që Rama i trembet më shumë

Nga Klementin Mile

Pas 19 ditësh protestë, shumë njerëz vazhdojnë të pyesin: po çfarë ka fituar konkretisht kjo protestë?

As Ramën nuk e rrëzoi.

As projektin nuk e ndaloi.

As ligjet nuk u shfuqizuan.

Dhe megjithatë, pikërisht këtu fshihet paradoksi.

Sepse protestat nuk fitojnë gjithmonë kur realizojnë kërkesën e tyre. Shpesh fitojnë kur e detyrojnë sistemin të ndryshojë sjellje.

Për herë të parë, një protestë qytetare në Shqipëri ka arritur ta nxjerrë një çështje lokale nga rrjetet sociale, nga sheshi dhe nga televizioni, për ta çuar deri në Parlamentin Europian.

Kjo nuk është më vetëm një betejë mes protestuesve dhe Ramës.

Tani kanë hyrë në lojë institucionet europiane.

Kjo është arsyeja pse momenti aktual është njëkohësisht edhe më i forti edhe më i rrezikshmi për protestën.

Më i forti, sepse ka fituar legjitimitet ndërkombëtar.

Më i rrezikshmi, sepse shumë lëvizje gabojnë pikërisht kur ndjejnë aromën e fitores.

Nëse tani protesta mjaftohet me emocionin e momentit, mund të fillojë rënia.

Por nëse arrin të transformohet nga protestë në mbikëqyrje qytetare, nga zemërim në organizim, nga reagim në institucion moral, atëherë mund të arrijë diçka shumë më të madhe se ndalimi i një projekti.

Mund të vendosë një rregull politik të ri në Shqipëri:

QË ASNJË PROJEKT I MADH TË MOS KALOJË MË PA TRANSPARENCË PUBLIKE, PA DEBAT PUBLIK DHE PA STANDARDE EUROPIANE TË VERIFIKUESHME.

Po ndodhi kjo, historia do ta kujtojë ndryshe këtë verë.

Jo si verën kur u protestua për flamingot.

Por si verën kur qytetarët i detyruan të pushtetshmit të japin llogari.