Nga lidhja jashtëmartesore me kolegen, tek Agasi – Kush e sulmoi Endri Meksin?
Ishte mbrëmje. Një nga ato orë kur qyteti fillon të ulet në ritëm dhe njerëzit kthehen në rutinën e tyre. Por për Endri Meksin, ajo natë nuk kishte asgjë të zakonshme.
Dikush kishte ardhur për ta sulmuar.
Nuk ishte një konflikt i rastësishëm, as një përplasje e momentit. Ishte një ndërhyrje e drejtpërdrejtë, e menduar. Një sinjal. Dhe si çdo sinjal i tillë, nuk kërkon vetëm të godasë, por të lërë gjurmë.
Meksi vendos të reagojë. Shkon në Polici. Bën denoncimin. Dokumenton ngjarjen. Në një shtet normal, ky është momenti kur institucionet marrin përgjegjësinë.
Por këtu, sipas rrëfimit që ai bën për Albanian Post, ndodh e kundërta.
Dosja kalon në prokurori. Ai paraqitet personalisht. Jep deklarimet. Pret. Dhe pastaj fillon ajo që ai e quan heshtje. Asnjë informacion. Asnjë zhvillim. Asnjë sinjal që dikush po merret seriozisht me atë që ka ndodhur.
Ndërkohë, detajet që do të duhej të ishin pjesë e hetimit, dalin nga një rrugë tjetër. Gazetarët e kronikës zbulojnë se kamerat e sigurisë nuk janë përcjellë nga Policia në prokurori. Një veprim që nuk është thjesht procedural. Është thelbësor.
“E kam parë si heshtje”, rrëfen Meksi për Albanian Post. “Unë e denoncova se dua transparencë”.
Por transparenca nuk vjen.
Dhe ndërkohë, historia nuk mbaron aty.
Vjen një moment i dytë. Një tjetër incident. Një tjetër përballje. Këtë herë jo vetëm si rrezik personal, por si tension i shpërndarë në ambientin ku ai punon. Në MCN TV.
Ai përshkruan një skenë të thjeshtë, por të rëndë. Korridori i televizionit. Ndërrimi i turnit. Ora afro tetë e mbrëmjes. Dhe në fytyrat e kolegëve, një shqetësim që nuk mund të fshihet.
Aty, thotë ai për Albanian Post, kuptoi se kjo nuk ishte më vetëm historia e tij.
“U ndjeva i trishtuar që ata po vuanin nga kjo situatë”, përmend ai. “Sepse deri në atë moment, e kisha marrë me sportivitet”.
Por kur frika kalon nga individi te ambienti, loja ndryshon.
Dhe pikërisht aty, ai vendos të flasë.
Në rrëfimin për Albanian Post, Meksi nuk pretendon se e di saktësisht arsyen e sulmeve. Por ai vendos disa pista. Jo si përfundime, por si mundësi.
E para lidhet me biznesin.
Ai operon në sektorë që në Shqipëri nuk janë thjesht tregje. Janë zona tensioni. Lojërat e fatit, teknologjia, projektet publike si AKSHI dhe ARRSH. Sektorë ku interesi ekonomik ndërthuret me ndikimin politik dhe ku çdo lëvizje krijon reagim.
Ai thotë se ka pasur indicie. Zhurma të vazhdueshme. Një klimë ku fokusi, shpesh, nuk është te rregullimi i tregut, por te denigrimi i aktorëve.
Një hetim nga Ministria e Financave ndaj një prej bizneseve të tij ka zgjatur mbi një vit dhe ende nuk ka përfunduar. Kontrolli, sipas tij, nuk ka afat. “Na thanë se do ta zgjasin sa të duan”, rrëfen për Albanian Post.
E dyta lidhet me institucionet.
Ai pretendon se në grupet e auditimit ka pasur persona të lidhur me individë të shpallur në kërkim për çështje të rënda që lidhen me AKSHI. Për këtë, thotë se ka bërë shkresë te Ministria e Financave dhe te SPAK. Përgjigjja, sërish, mungon.
Dhe ndërkohë, një tjetër element e shqetëson.
“Kam marrë informacion se Policia rrjedh”, thotë ai për Albanian Post. Një akuzë që, në vetvete, e zhvendos problemin nga një rast individual në një krizë besimi.
E treta është më e ndërlikuar. Dhe më personale.
Ai pranon se jeta e tij private ka qenë e trazuar. Një marrëdhënie e gjatë jashtëmartesore me një kolege pune. Një histori që për vite ka qenë e heshtur, por që përfundon në një moment kur, sipas tij, përplasen edhe interesa më të mëdha.
Ai nuk e lidh drejtpërdrejt këtë me sulmet. Por nuk e përjashton si element që mund të ketë ndikuar në klimën e përgjithshme.
“Nuk e di cili është shkaku”, thotë për Albanian Post. “Prandaj i kam referuar disa emra në prokurori. Le ta bëjë punën Prokuroria”.
Por deri tani, Prokuroria nuk ka folur.
Dhe pikërisht kjo e kthen këtë histori në diçka më shumë se një rrëfim personal.
Sepse në fund, ajo që mbetet nuk është vetëm pyetja se kush e sulmoi.
Por pse, pas dy episodeve, një sistemi të tërë duket sikur i mungon interesi për ta zbuluar.