Kim Jong Un lavdëron ushtarët që vetëvriten për të mos rënë rob në Ukrainë
Udhëheqësi i Koresë së Veriut, Kim Jong Un, ka konfirmuar publikisht një praktikë që prej kohësh ishte raportuar nga shërbimet e inteligjencës: urdhrin që ushtarët koreano-veriorë të mos bien të gjallë në duart e armikut.
Në një ceremoni përkujtimore në Pyongyang për ushtarët e vrarë në luftën në Ukrainë, Kim vlerësoi ata që, sipas tij, “zgjodhën pa hezitim vetëshpërthimin dhe sulmin vetëvrasës për të mbrojtur nderin e madh”, duke i cilësuar si “heronj”.
Deklarata përbën konfirmimin më të drejtpërdrejtë deri tani të politikës së dyshuar të Koresë së Veriut që ushtarët të vetëvriten në vend që të kapen rob nga forcat ukrainase.
Sipas vlerësimeve të Koresë së Jugut, rreth 15 mijë ushtarë koreano-veriorë janë dërguar për të mbështetur Rusinë në përpjekjet për rimarrjen e zonave në rajonin e Kurskut, ndërsa mbi 6 mijë prej tyre besohet se janë vrarë.
As Koreja e Veriut dhe as Rusia nuk kanë konfirmuar zyrtarisht këto shifra.
Sipas agjencive të inteligjencës dhe dëshmive të dezertorëve, ushtarët koreano-veriorë trajnohen që kapja nga armiku të etiketohet si tradhti.
Në kulturën ushtarake të regjimit të Phenianit, rënia rob shihet si dështim absolut ndaj shtetit dhe partisë.
Më herët gjatë këtij viti, media koreano-jugore Munhwa Broadcasting Corporation transmetoi dëshmitë e dy ushtarëve koreano-veriorë të kapur në Ukrainë. Njëri prej tyre deklaroi se ndiente pendesë që nuk kishte vrarë veten.
Sipas tij, shumica e shokëve të tij kishin shpërthyer veten për të shmangur kapjen.
Shërbimi Kombëtar i Inteligjencës së Koresë së Jugut ka deklaruar më parë se dokumente të gjetura tek trupat e ushtarëve të vrarë sugjerojnë ekzistencën e urdhrave për vetëvrasje në rast rreziku kapjeje.
Në të njëjtin fjalim, Kim lavdëroi edhe ushtarët e vrarë në vijën e parë të frontit, duke i cilësuar “luftëtarë besnikë të partisë dhe patriotë”.
Ceremonia u zhvillua në prani të zyrtarëve të lartë rusë, përfshirë ministrin rus të Mbrojtjes Andrey Belousov dhe kryetarin e Dumës ruse Vyacheslav Volodin, duke reflektuar afrimin e thelluar mes Moskës dhe Phenianit.
Aleanca mes Vladimir Putin dhe Kim Jong Un u formalizua më tej në qershor 2024, kur të dy liderët nënshkruan një marrëveshje strategjike që parashikon ndihmë të ndërsjellë në rast “agresioni” ndaj njërës palë.
Përveç trupave ushtarake, Pheniani ka premtuar edhe dërgimin e mijëra punëtorëve për rindërtimin e rajonit të Kurskut.
Përfshirja gjithnjë e më e drejtpërdrejtë e Koresë së Veriut në luftën e Ukrainës shihet si një zhvillim që thellon ndërkombëtarizimin e konfliktit dhe forcon boshtin strategjik Moskë-Phenian, ndërsa ngre shqetësime të reja mbi standardet humane dhe praktikat ushtarake të regjimit koreano-verior.