Kanadaja mbi 70 miliardë dollarë për 12 nëndetëse gjermane

Kanadaja ka përzgjedhur konsorciumin gjerman ThyssenKrupp Marine Systems (TKMS) për ndërtimin e 12 nëndetëseve moderne, në një nga kontratat më të mëdha ushtarake në historinë e vendit, e cila pritet të forcojë më tej lidhjet e saj me NATO-n.

Kryeministri Mark Carney njoftoi të hënën fituesin e garës për zëvendësimin e flotës aktuale të nëndetëseve, të përbërë nga mjete të përdorura, shumica e të cilave ndodhen aktualisht në mirëmbajtje.

Prej muajsh, në garë ishin konsorciumi gjerman TKMS dhe kompania koreano-jugore Hanwha Ocean, të cilat kishin paraqitur oferta me teknologji të avancuar dhe premtime për përfitime ekonomike për Kanadanë.

TKMS është prodhuesi më i madh në botë i nëndetëseve jo-bërthamore dhe një nga furnizuesit kryesorë të flotës së NATO-s. Oferta fituese përfshin modelin 212CD, ndërsa Hanwha kishte propozuar modelin KSS-III Batch-II, të cilin autoritetet kanadeze e kishin vlerësuar gjithashtu si të përshtatshëm për nevojat e forcave të armatosura.

Porosia për 12 nëndetëse shënon herën e parë që Kanadaja blen mjete të reja të këtij lloji. Aktualisht, Marina Mbretërore Kanadeze disponon katër nëndetëse të klasës Victoria, të blera të përdorura nga Mbretëria e Bashkuar në vitin 1998, ndërsa tre prej tyre janë jashtë shërbimit për shkak të mirëmbajtjes.

Nëndetëset e reja pritet të forcojnë praninë e Kanadasë në Arktik. Mjetet e prodhuara nga TKMS janë projektuar me teknologji moderne të fshehtësisë, duke u mundësuar operimin në zona me rrezik të lartë pa u zbuluar lehtësisht, si edhe zhvillimin e misioneve të gjata të vëzhgimit në rrugët strategjike të Arktikut, përfshirë Kalimin Veriperëndimor.

Vlera e kontratës për ndërtimin e nëndetëseve llogaritet të kalojë 12 miliardë dollarë amerikanë, ndërsa, së bashku me mirëmbajtjen për rreth 50 vjet, kostoja totale e projektit mund të tejkalojë 70 miliardë dollarë.