Gjermania heq dorë nga ndërtimi i luftanijes më e madhe që prej Luftës së Dytë Botërore

Gjermania po përgatitet të heqë dorë nga projekti për ndërtimin e luftanijes më të madhe të porositur nga marina e saj që nga Lufta e Dytë Botërore, në një vendim që konsiderohet një nga dështimet më të mëdha të prokurimeve ushtarake në historinë e fundit të vendit.

Sipas një raportimi të Financial Times, ministri i Mbrojtjes Boris Pistorius dhe zyrtarë të tjerë të lartë kanë informuar përfaqësues të industrisë dhe deputetë se qeveria synon të anulojë planin për ndërtimin e gjashtë fregatave F126.

Në vend të tyre, Berlini planifikon të blejë tetë fregata më të vogla të tipit MEKO A-200, të cilat konsiderohen më ekonomike dhe më të shpejta për t’u vënë në shërbim.

Vendimi përbën një goditje për kompaninë gjermane të mbrojtjes Rheinmetall, e cila priste të merrte drejtimin e projektit F126 në një kontratë me vlerë 12.8 miliardë euro.

Fregata F126 ishte projektuar si një anije shumëfunksionale me gjatësi 166 metra dhe peshë rreth 10 mijë tonë, e aftë të qëndronte për periudha të gjata në det dhe të kryente një gamë të gjerë operacionesh ushtarake.

Një nga aftësitë kryesore të saj ishte lufta kundër nëndetëseve, një kapacitet që fitoi rëndësi të veçantë pas pushtimit rus të Ukrainës në vitin 2022 dhe rritjes së pranisë së NATO-s në Detin Baltik dhe Atlantikun e Veriut.

Megjithatë, projekti u përball me vonesa të shumta dhe tejkalime të kostove, të shkaktuara nga probleme me softuerin dhe vështirësi në koordinimin mes agjencisë gjermane të prokurimeve dhe kantierit holandez Damen Naval, i cili kishte fituar kontratën fillestare në vitin 2020.

Sipas raportit, anulimi i programit pritet t’i kushtojë qeverisë gjermane rreth 2 miliardë euro, të cilat do të regjistrohen si humbje.

Vendimi është veçanërisht i ndjeshëm në një moment kur Berlini po synon të marrë një rol më të madh në mbrojtjen evropiane dhe ka planifikuar të investojë rreth 780 miliardë euro për modernizimin e forcave të armatosura deri në fund të vitit 2030.