Gazetari nxjerr faktet e rënda, kundër Arben Ahmetajt

Nga Adriatik Doçi

Monologut të radhës së Arben Ahmetajt nga kazinoja e St.Moritz në Zvicër, shfaqur në Zeni Tv, këtë herë pasuruar me raketa, përgjime dhe eliminime si një film triller, i mungonin sërish disa pyetje, me rëndësi jo vetëm për besueshmërinë e akuzave të pretenduara, por tregues edhe i mosveprimit të SPAK për disa episode të tjera të dyshuara dhe të pandëshkuara korruptive.

-Si e binde Albtelekom në 2016, kur ishte ministër Financash që të tërhiqej nga beteja gjyqësore për kërkimin e detyrimit prej 23 milionë eurosh ndaj kompanisë Hermes, kur ju keni qenë pronar i Hermes gjatë vjedhjes me impulset telefonike, dhe në një kohë kur Ministria e Financave që ju drejtonit kishte kishte 14 % të aksioneve në Albtelekom?

-Cili është burimi i 93 mijë eurove që keni shpenzuar në kazinonë Dragonara të Maltës në muajin korrik të vitit 2018? Pse nuk e keni deklaruar këtë shpenzim në ILDKPKI sipas ligjit? Sa shuma të tjera parash keni shpenzuar nëpër kazinotë e Evropës?

-Çfarë të lidh me pikën e këmbimit valutor me nipt K72806620K dhe si i tërheq paratë e padeklaruara në Zvicër?

-A i keni kërkuar Erion Veliajt në zyrë për t’u dhënë fondet e rindërtimit disa klientëve tuaj të preferuar dhe çfarë keni përfituar në këmbim?

-Si ka mundësi që Gazim Bregu, pasi ndërtoi falas vilën tuaj në Hamallaj, përfitoi 20 milionë euro nga fondet e rindërtimit, për menaxhimin e të cilave Edi Rama të kishte caktuar pikërisht ty?

-Meqenëse rrihni gjoksin se keni kundërshtuar inceneratorin e Tiranës, pse nuk i kundërshtuat edhe inceneratorët e Fierit dhe Elbasanit si atë të Tiranës? A nuk financoheshin të tre me para publike?

-Në bisedat telefonike me Ilir Metën (njëri nga burgu, tjetri nga arratia), cilit gjyqtar i referoheni që ka pranuar pranuar ofertën që i keni bërë përmes një të afërmi të tij?

-A keni kërcënuar nga Zvicra zyrtarë publikë që të mos zbatojnë vendimet e GJKKO për sekustrimin e disa pasurive të tuat si produkt i aferave korruptive?

-A po shantazhoni disa biznesmenë, të favorizuar nga ju gjatë periudhës 2013-2022, për të kaluar sipërfaqe ndërtimore, pjesë kullash, aksione, vila dhe para në emrin subjekteve prestanome brenda dhe jashtë vendit?