Dosja “Balluku”, i pandehur dhe biznesmeni nga Tepelena (vëllai i kryebashkiakut Gramoz Sako)
Në dosjen e Belinda Ballukut janë 31 të pandehur, mes tyre pesë ndërtues dhe dy kompani private.
SPAK akuzon Arbër Abazin për korrupsion aktiv dhe falsifikim dokumentesh, pasi dyshohet se i dha Ballukut një vilë në Palasë në këmbim të tenderit të Lotit 7 të Unazës së Madhe.
Për falsifikim dokumentesh akuzohen edhe Artan Sako, Paqsor Buzi dhe kompani të lidhura me ta.
Ndërsa Pandeli Carapuli akuzohet për pastrim parash në lidhje me vilën në White Rocks, në Dhërmi.
Të pandehurit e tjerë janë kryesisht ish-vartës dhe bashkëpunëtorë të Ballukut.
Ervis Berberi përballet me nëntë akuza për shkelje në tendera, ndërsa mbi 10 persona akuzohen për shkelje në tenderin e Tunelit të Llogorasë, mes tyre edhe ish-sekretarja e Përgjithshme e MIE, Viola Haxhiademi.
Të akuzuarit e dosjes Balluku:
Belinda Balluku, shkelje e barazisë në 9 tendera; Korrupsion, pastrim parash, mosdeklarim pasurie
Pandeli Carapuli, pastrim parash
Igli Tare Pastrim parash në 2 raste
Joana Bushi, pastrim parash
Arbër Abazi, korrupsion aktiv; Falsifikim dokumentesh
“Alko Impex General Construction”, korrupsion aktiv
Viola Haxhiademi, shpërdorim detyre Tuneli i Llogarasë
Ergys Verdho, shpërdorim detyre Tuneli i Llogarasë
Adja Strazimiri, shpërdorim detyre; Shkelje në tendera
Anila Sulollari, shpërdorim detyre Tuneli i Llogarasë
Paqsor Buzi, falsifikim dokumentesh disa herë
Artan Sako, falsifikim dokumentesh disa herë
Ram Geci, falsifikim dokumentesh disa herë
“Eurocol” sh.p.k, pastrim parash
Evis Berberi, shkelje në 9 tendera
Gentian Gjyli, shkelje në tendera dhe shpërdorim detyre
Erald Elezi, shkelje në 3 tendera
Jetmira Dervishi, shkelje në tendera
Mirzeta Kashnica, shkelje në tendera
Jonida Çeçe, shkelje në 3 tendera
Adrian Kroi, shkelje në 4 tendera; Shpërdorim detyre
Denis Xhoshi, shkelje në 3 tendera
Klarita Konomi, shkelje në 1 tender
Miranda Shkurti, shkelje në 8 tendera
Genti Raça, shkelje në 5 tendera; Shpërdorim detyre
Eduart Agalliu, shkelje në 1 tender
Arbër Troka, shkelje në 2 tendera
Dhurata Lazaj, shkelje në 3 tendera
Nikollaq Mihali, shkelje në 3 tendera
Gëzim Noni, shkelje në 3 tendera
Arlinda Gordani, shkelje në 4 tendera.
Tenderi korruptiv
Biznesmeni Arbër Abazi dhe kompania e tij “Alko Impex General Construction” fituan tenderin e manipuluar të ndërtimit të Lotit 7 të Unazës së Madhe të Tiranës. Abazi akuzohet për korrupsion aktiv pasi për fitimin e tenderit shpërbleu Ballukun me një vilë në zonën e Palasës në Bregdet, ndërsa akuzohet edhe për falsifikim dokumentesh.
Bashkë me Abazin për falsifikim dokumentesh janë marrë edhe Artan Sako I kompanisë së ndërtimit 2T, e cila bashkë me Alko Impex General Construction fitoi tenderin e lotit 7, Paqsor Buzi i cili me kompaninë e tij G.P.G. COMPANY fitoi tenderin e lotit 5 të Unazës së Tiranës si edhe ndërtuesi i njohur Ram Geci, firma e ndërtimit të të cilit ka fituar tenderin rreth 14 mln eurosh (me kursin e sotëm) të ndërtimit të rrugës “Porto Romano-Durrës, loti 3”.
Ka qenë pikërisht ky tenderi i nëntë për të cilin Balluku akuzohet se ka manipuluar, përveç atij të Tunelit të Llogorasë dhe 7 loteve të Unazës së Madhe.
Lidhjet e Artan Sakos
Artan Sako, biznesmeni nga Tepelena, është vëllai i kryebashkiakut Gramoz Sako.
Sako është lakuar shpesh për aktivitetin e tij, ku në të paktën dy procedime të mëparshme të SPAK, kompania që posedon rezulton se ka marrë pjesë në tendera publik. E para, ka të bëjë me hetimet për ish-kreun e Autoritetit Rrugor Shqiptar Evis Berberin, teksa ky i fundit ra në pranga për korrupsion pasiv dhe pastrim parash.
Emri i Sakos përmendej në procedurat e një tenderi, që iu dha kompanisë të tij të quajtur “2 T” për mirëmbajtje rruge, ku në garë ishte vetëm kompania në fjalë dhe u shpall fituese me ofertën 99% të fondit limit.
Sipas Qendrës Kombëtare të Biznesit, “2T” është në pronësi të Dritan Troksit dhe Artan Sakos. Objekt i tenderit të ARRSH-së ku “2 T” u shpall fituese, kishte “mirëmbajtjen me performancë të akseve kryesore të tre rajoneve”, Qendror dhe Juglindor me një vlerë rreth 50 milionë euro, ndërkohë loti 3, ka një vlerë totale 1.455.726.087 lekë me TVSH, ose rreth 12 milionë euro.