Danimarka paralajmëron për një sulm të kufizuar rus ndaj NATO-s

Rusia mund të ndërmarrë një sulm të kufizuar ushtarak kundër një vendi të NATO-s brenda muajve të ardhshëm, sipas një vlerësimi të ri të Shërbimit Danez të Inteligjencës së Mbrojtjes.

Shërbimi danez vlerëson se ekziston një rrezik “i ulët, por në rritje” që Moska të dërgojë një numër të vogël trupash, potencialisht pa shenja identifikuese, në territorin e një vendi fqinj ose të përdorë armë me rreze të gjatë kundër infrastrukturës që mbështet Ukrainën.

“Mund të përfshijë vendosjen e forcave ushtarake në një zonë të kufizuar brenda vendeve të NATO-s që kufizohen me Rusinë – për shembull, nën pretekstin e mbrojtjes së pakicave lokale ruse”, tha kreu i inteligjencës daneze, Thomas Ahrenkiel.

“Qëllimi do të ishte përçarja e aleancës”, shtoi ai.

Paralajmërimi vjen pas një sërë incidentesh që autoritetet perëndimore i kanë lidhur me kërcënimet hibride, përfshirë një sulm me dron ndaj aeroportit të Leipzigut në Gjermani, i cili u parandalua, dhe një incident ku një anije ruse qëlloi me fishekzjarre sinjalizuese drejt një helikopteri danez mbi Detin Baltik.

Inteligjenca daneze paralajmëron se Rusia mund të intensifikojë sulmet hibride ndaj vendeve evropiane, me pasoja më të rënda, përfshirë “sulme kibernetike shkatërruese që paralizojnë funksionet e shoqërisë” dhe akte sabotimi me rrezik të lartë për viktima.

Megjithatë, një pushtim në shkallë të gjerë i një vendi të NATO-s vlerësohet si “shumë pak i mundshëm” në kushtet aktuale, pasi do të kërkonte grumbullimin e forcave për të paktën gjashtë muaj. Shërbimi danez thekson se një skenar i tillë nuk mund të përjashtohet plotësisht.

Sipas vlerësimit, Rusisë do t’i duheshin rreth gjashtë muaj për të qenë në gjendje të zhvillonte një luftë lokale kundër një vendi fqinj anëtar të NATO-s, dy vjet për të krijuar një kërcënim të besueshëm për një luftë rajonale dhe pesë vjet për një luftë në shkallë të gjerë në Evropë.