Aktori i njohur: Më kërkuan të flija me Sharon Stone, për të përmirësuar marrëdhëniet me të

Billy Baldwin ka rrëfyer detaje të panjohura nga xhirimet e filmit “Sliver”, ku luajti përkrah Sharon Stone në vitin 1993, duke pranuar se nuk do të dëshironte të bashkëpunonte sërish me aktoren.

Në një intervistë për videopodcastin “Lisa Guerrero Unleashed”, Baldwin tha se marrëdhënia mes tyre u përkeqësua gjatë xhirimeve dhe se situata krijoi tension për të gjithë ekipin.

“Shkonim mjaft mirë gjatë dy javëve të para. Më pas, për tre muaj, ajo nuk më thoshte as ‘përshëndetje’ dhe as ‘mirupafshim’”, tregoi aktori.

Ai zbuloi se situata ishte bërë aq e sikletshme, saqë u kërkoi producentëve të mos e detyronin të puthte Stone në një skenë intime.

“E bëj skenën, por ju lutem, mos më kërkoni ta puth. Nuk mund ta puth”, kujtoi Baldwin.

Aktori foli gjithashtu për producentin Robert Evans, i cili, sipas tij, u kishte sugjeruar të dyve që ta zgjidhnin tensionin mes tyre përmes një marrëdhënieje seksuale jashtë kamerave.

“Vazhdon të më vijnë njoftime se mes jush ka një tension jashtëzakonisht të keq… gjithë kjo energji seksuale e akumuluar. Thjesht bëjeni dhe mbarojeni”, tha Baldwin duke kujtuar fjalët e producentit.

Stone kishte bërë një pretendim të ngjashëm në kujtimet e saj “The Beauty of Living Twice”, ku shkruante se Evans i kishte sugjeruar të kryente marrëdhënie seksuale me Baldwin për të përmirësuar performancën e tij. Baldwin e kishte mohuar këtë deklaratë në atë periudhë.

Pavarësisht tensioneve, aktori pati fjalë të mira për Stone si artiste, duke e cilësuar praninë e saj në ekran si të jashtëzakonshme dhe duke iu referuar edhe skenës ikonike të këmbëve në “Basic Instinct”.

Në fund, Baldwin tha se nuk dëshiron që përplasja mes tyre të vazhdojë.

“Do të doja t’i jepja dorën ose ta përqafoja”, u shpreh ai.