Takim sekret në Vjenë për paqen në Ukrainë
Ish-zyrtarë të lartë nga Britania e Madhe, Franca, Gjermania dhe Rusia zhvilluan muajin e kaluar një takim konfidencial në Vjenë për të shqyrtuar kushtet e mundshme për nisjen e bisedimeve të paqes që do t’i jepnin fund luftës në Ukrainë.
Lajmi u raportua nga Bloomberg, duke cituar burime të njohura me takimin.
Sipas tyre, në takim morën pjesë ish-këshilltari për Sigurinë Kombëtare i Britanisë së Madhe, Tim Barrow, ish-sekretari i Shtetit në Ministrinë e Jashtme të Gjermanisë, Markus Ederer, si dhe diplomati veteran francez Pierre Vimont.
Burimet nuk zbuluan identitetin e ish-zyrtarit të Kremlinit që mori pjesë në diskutime.
Takimi u zhvillua me nismën e Centre for Humanitarian Dialogue, një organizatë me seli në Zvicër që merret me ndërmjetësimin e konflikteve dhe e përshkruan veten si një pionier të diplomacisë diskrete dhe të pavarur.
Sipas Bloomberg, nuk është e pazakontë që ish-zyrtarë dhe institute kërkimore të zhvillojnë kontakte jozyrtare, larg qeverive, për të testuar mundësi të reja për zgjidhjen e krizave ndërkombëtare.
Burimet nuk sqaruan nëse takimi ishte pjesë e një nisme të koordinuar nga Britania, Franca dhe Gjermania për të vendosur kontakte me Kremlinin.
Megjithatë, një burim tha se Britania e Madhe e mirëpriste këtë përpjekje, ndërsa një tjetër konfirmoi se Franca ishte në dijeni të zhvillimit të takimit.
Një zëdhënës i qeverisë britanike deklaroi: “Britania e Madhe mbështet përpjekjet për të siguruar një paqe të drejtë dhe të qëndrueshme për Ukrainën. Ne nuk komentojmë aktivitetin e ish-zyrtarëve.”