SHBA dhe Irani zgjerojnë frontin e përplasjes
Irani deklaroi se ka goditur një bazë ushtarake të Shteteve të Bashkuara në Bahrein, duke e cilësuar sulmin si “fazën e dytë të kundërpërgjigjes” ndaj operacioneve amerikane kundër objektivave iraniane.
Njëkohësisht, Komanda Qendrore e Shteteve të Bashkuara (CENTCOM) njoftoi se gjatë natës ka ndërmarrë një valë të re sulmesh ndaj dhjetëra objektivave në disa zona të Iranit.
Sipas CENTCOM, objektivat përfshinin sisteme të mbrojtjes ajrore, stacione bregdetare radarësh, kapacitete raketore dhe të dronëve, si edhe mjete të vogla detare.
Komanda amerikane bëri të ditur se në operacion u përdorën avionë luftarakë, mjete të Marinës, dronë sulmues njëdrejtimësh dhe, për herë të parë, edhe dronë detarë njëdrejtimësh.
“Forcat amerikane mbeten të gatshme të garantojnë lirinë e lundrimit për anijet tregtare. Irani nuk e kontrollon Ngushticën e Hormuzit”, deklaroi CENTCOM.
Ndërkohë, Trupat e Gardës Revolucionare Islamike (IRGC) thanë se raketa dhe dronë iranianë goditën depo karburanti dhe municionesh në Bazën Ajrore “Prince Hassan” në Jordani, duke shkaktuar zjarr.
Sipas IRGC-së, kjo ishte “faza e parë” e operacionit hakmarrës pas sulmeve amerikane ndaj bazave bregdetare iraniane dhe operacioni vazhdon ende.
Në një deklaratë të veçantë, marina e Gardës Revolucionare njoftoi se kishte ndërmarrë një operacion gjatë natës në Ngushticën e Hormuzit, ku, sipas saj, neutralizoi sistemet e dy anijeve që akuzohen se kishin shkelur rregullat e lundrimit dhe kishin rrezikuar sigurinë detare.
Nga ana tjetër, Ministria e Brendshme e Bahrejnit raportoi aktivizimin e sirenave të alarmit në vend.
Ndërkohë, media shtetërore iraniane bëri të ditur se një person humbi jetën dhe katër të tjerë u plagosën pas një sulmi amerikan ndaj një stacioni të pompimit të ujit në jugperëndim të Iranit.
Agjencia iraniane Fars raportoi gjithashtu se sulme amerikane goditën zonat Abadan dhe Shadegan në provincën Khuzestan, ndërsa media rajonale raportuan edhe ndërprerje të energjisë elektrike në qytetin Ahvaz.
Në zhvillime të tjera, Axios, duke cituar një zyrtar amerikan, raportoi se rreth 20 anije tregtare kanë kaluar gjatë 24 orëve të fundit në Ngushticën e Hormuzit në koordinim me ushtrinë e Shteteve të Bashkuara, ndërsa disa mjete të tjera lundruese e kanë bërë kalimin pa këtë koordinim.
Më herët, Ministria e Jashtme e Iranit akuzoi Shtetet e Bashkuara se penguan arritjen e një marrëveshjeje për menaxhimin e situatës në Ngushticën e Hormuzit gjatë bisedimeve të zhvilluara në Muskat, duke pretenduar se Washingtoni ushtroi presion ndaj Omanit.
Sipas CENTCOM, presidenti i Shteteve të Bashkuara, Donald Trump, urdhëroi valën më të fundit të sulmeve për të “dobësuar më tej aftësinë e forcave iraniane për të sulmuar anijet civile dhe tregtare” në Ngushticën e Hormuzit.