Irani shpall fundin e operacionit ushtarak kundër Izraelit
Komanda e Forcave të Armatosura të Iranit njoftoi mesditën e të hënës ndërprerjen e operacionit ushtarak kundër Izraelit, duke sinjalizuar një ulje të përkohshme të tensioneve pas përplasjes së drejtpërdrejtë mes dy vendeve.
Në një deklaratë zyrtare, autoritetet ushtarake iraniane thanë se Teherani kishte dhënë një “përgjigje të ashpër” ndaj bombardimeve izraelite në periferinë jugore të Bejrutit.
“Si rezultat, njoftohet ndërprerja e operacionit”, thuhet në deklaratë, ndërsa paralajmërohet se çdo sulm i ri izraelit ndaj Libanit do të përballet me kundërpërgjigje më të forta.
Një mesazh i ngjashëm u publikua edhe nga Shtabi Qendror Khatam al-Anbiya, një nga strukturat më të rëndësishme të Gardës Revolucionare Islamike.
Sipas medias shtetërore iraniane IRIB, autoritetet ushtarake deklaruan se operacioni i fundit ishte një përgjigje ndaj veprimeve izraelite në Liban dhe paralajmëruan se sulmet mund të rifillojnë “nëse agresioni dhe aktet armiqësore vazhdojnë, përfshirë në Libanin jugor”.
Megjithatë, pavarësisht njoftimit për ndalimin e operacionit, zyrtarë dhe analistë iranianë e paraqitën kundërpërgjigjen si pjesë të një strategjie më të gjerë për të ruajtur ndikimin rajonal të Teheranit.
“Irani nuk mund të mos përgjigjej. Mosveprimi do të interpretohej si dobësi”, tha Ali Vaez, analist i lartë për Iranin në International Crisis Group.
Për javë të tëra, Teherani kishte paralajmëruar se do të ndryshonte qasjen e tij nëse Izraeli zgjeronte operacionet ushtarake nga Libani jugor drejt periferive të Bejrutit, ku Hezbollah ka ndikim të fortë.
“Irani nuk po mbron vetëm Libanin. Kjo ishte shpallja formale e një doktrine strategjike”, deklaroi Sadegh Larijani, kreu i Këshillit të Interesit të Shtetit, një organ këshillimor pranë udhëheqjes iraniane.
“Nëse sulmohet ndonjë komponent i Boshtit të Rezistencës, përgjigjja do të shkojë përtej kufijve gjeografikë dhe do të ndryshojë ekuilibrat rajonalë të fuqisë”, shtoi ai.
Sipas analistëve, udhëheqja e re iraniane po ndjek një linjë më agresive krahasuar me të kaluarën, duke argumentuar se vetëm kundërpërgjigjet e forta mund të pengojnë sulme të mëtejshme nga Izraeli dhe Shtetet e Bashkuara.
Megjithatë, pavarësisht retorikës së ashpër, diplomatët që kanë kontakte me zyrtarët iranianë thonë se Teherani vlerëson se një rikthim i plotë i Shteteve të Bashkuara në konflikt mbetet i pamundur në kushtet aktuale.
“Ata nuk besojnë se Donald Trump do të hyjë në luftë. Por edhe nëse kjo ndodh, janë relativisht të bindur se mund ta menaxhojnë situatën”, tha Farzan Sabet, analist në Institutin e Studimeve Ndërkombëtare në Gjenevë.