Gonorrea dhe sifilizi arrijnë nivele rekord në Evropë
Infeksionet seksualisht të transmetueshme si gonorrea dhe sifilizi kanë arritur nivele rekord në Evropë gjatë vitit 2024, sipas të dhënave të publikuara nga Qendra Evropiane për Parandalimin dhe Kontrollin e Sëmundjeve (ECDC).
Sipas raportit, të dy sëmundjet kanë shënuar shifrat më të larta në më shumë se një dekadë, duke reflektuar një rritje të ndjeshme të transmetimit në popullatë. Gonorrea ka arritur në mbi 106 mijë raste, një rritje prej më shumë se 300% që nga viti 2015, ndërsa sifilizi është dyfishuar në të njëjtën periudhë, duke shkuar në mbi 45 mijë raste të raportuara.
Autoritetet shëndetësore evropiane paralajmërojnë se kjo rritje lidhet, ndër të tjera, me boshllëqe në testim dhe parandalim. Sipas tyre, mungesa e diagnostikimit të hershëm dhe përdorimi i pamjaftueshëm i masave mbrojtëse po kontribuojnë në përhapjen e infeksioneve.
Zyrtarë të ECDC theksojnë se këto sëmundje mund të shkaktojnë komplikacione serioze shëndetësore, përfshirë dhimbje kronike dhe infertilitet, ndërsa sifilizi në raste të avancuara mund të dëmtojë zemrën dhe sistemin nervor. Një shqetësim i veçantë mbetet edhe sifilizi kongjenital, ku infeksioni transmetohet nga nëna tek foshnja, me pasoja potencialisht të rënda afatgjata.
Sipas të dhënave, Spanja ka regjistruar numrin më të lartë të rasteve të gonorresë dhe sifilizit në Evropë gjatë vitit 2024, me dhjetëra mijëra infeksione të konfirmuara.
Ndërkohë, chlamydia mbetet infeksioni bakterial më i raportuar në kontinent, edhe pse ka shënuar një rënie të lehtë krahasuar me vitin 2015.
Në Mbretërinë e Bashkuar, të dhënat zyrtare tregojnë gjithashtu një nivel të lartë të infeksioneve seksualisht të transmetueshme. Autoritetet shëndetësore raportojnë dhjetëra mijëra raste të gonorresë dhe sifilizit në vit, duke e vendosur vendin mes atyre me incidencë të lartë në Evropë.
Ekspertët shëndetësorë i bëjnë thirrje popullatës për përdorim të mbrojtjes gjatë marrëdhënieve seksuale dhe testim të rregullt, sidomos në rastet me partnerë të rinj ose të shumtë, duke theksuar se parandalimi mbetet mjeti më efektiv për të frenuar përhapjen e këtyre infeksioneve.