Universiteti elitar në Moskë furnizon GRU me hakerë dhe agjentë
Mbi 2 mijë dokumente të brendshme të rrjedhura kanë zbuluar se Bauman Moscow State Technical University, një nga universitetet më prestigjioze teknike të Rusisë, ka ngritur një departament sekret për të trajnuar hakerë, sabotatorë dhe oficerë inteligjence për GRU-në, shërbimin ushtarak të inteligjencës së Kremlinit.
Sipas hetimit të publikuar nga një konsorcium mediash ndërkombëtare, përfshirë Le Monde dhe Der Spiegel, ky departament i fshehtë, i njohur si “Department No. 4”, përgatit studentë që më pas dërgohen direkt në njësitë më famëkeqe të operacioneve kibernetike ruse.
Dokumentet tregojnë se studentët mësojnë teknika të avancuara të hakerimit, përfshirë thyerjen e fjalëkalimeve, krijimin e viruseve kompjuterike, infiltrimin në serverë dhe përdorimin e mjeteve si Metasploit për të shfrytëzuar dobësi në rrjete të mbrojtura.
Një pjesë e të diplomuarve përfundojnë në njësinë 26165 të GRU-së, e njohur globalisht si APT28, grupi i akuzuar për ndërhyrje në zgjedhjet amerikane të vitit 2016, sulme ndaj fushatës së Emmanuel Macron dhe operacione të shumta kibernetike në Evropë.
Hetimi zbulon gjithashtu se programi nuk kufizohet vetëm te aftësitë teknike. Studentët trajnohen edhe në propagandë, manipulim psikologjik dhe luftë informacioni, me materiale që përsërisin narrativat zyrtare të Kremlinit për Ukrainën dhe Perëndimin.
Në krye të këtij programi është identifikuar nënkoloneli Kirill Stupakov, oficer aktiv i inteligjencës ushtarake ruse, i cili sipas dokumenteve ka drejtuar njësi operative të GRU-së dhe njëkohësisht ka ndërtuar kurrikulën e këtij formimi sekret.
Sipas ekspertëve të sigurisë kibernetike, ky është një tregues i qartë i militarizimit të arsimit në Rusi dhe integrimit të universiteteve në arkitekturën e luftës hibride të Vladimir Putin.
Ky zbulim vjen në një kohë kur vendet evropiane, përfshirë Suedinë, Gjermaninë dhe Poloninë, kanë akuzuar Rusinë për intensifikim të sulmeve kibernetike kundër institucioneve shtetërore dhe infrastrukturës kritike.