Rasti tronditës: Nëna e 10 fëmijëve mbajti si skllave një grua për 25 vjet

Një rast tronditës ka dalë në dritë në Britani, ku një nënë 56-vjeçare me 10 fëmijë mbante një grua me aftësi të kufizuara si skllave. Ajo e detyronte të pastronte, nuk i jepte ushqim, e rrihte dhe merrte përfitime, duke fituar më shumë se 115,000 euro. Gjykata vendosi që gruaja të dërgohej në burg, teksa viktima përshkroi vështirësitë me të cilat u përball në përshtatjen me jetën e saj të re.

Mandy Wixon e detyroi gruan me aftësi të kufizuara, që është identifikuar në mediat britanike me inicialin “K”, të pastronte shtëpinë e saj në Tewkesbury në Gloucestershire, i dha ushqim të mbetur, i hodhi zbardhues në fytyrë, i rruante kokën disa herë dhe i vinte lëng për larjen e enëve në gojë. Vlen të përmendet se 13 persona jetonin në këtë shtëpi herë pas here.

“K” lindi në një familje me probleme dhe ishte 16 vjeç në vitin 1996 kur iu dha Wixon. Në moshën 40 vjeçe, në mars të vitit 2021, ajo u gjend në një paraburgim policor pasi njëri nga djemtë e 56-vjeçares, i cili ishte arratisur nga shtëpia, ngriti një padi.
Gruaja rrihej rregullisht me fshesë dhe i thyheshin dhëmbët. Asaj i ndalohej të dilte nga shtëpia dhe detyrohej të lahej fshehurazi natën.

Dhoma e saj u përshkrua nga policia si një “qeli”, ndërsa shtëpia ishte e rrëmujshme dhe e ndyrë. Kur u zbulua rasti i tmerrshëm, “K” kishte shenja në fytyrë nga zbardhuesi, mavijosje dhe kallo në këmbë, pasi detyrohej të pastronte dyshemetë në gjunjë.

“Nuk dua të jem këtu. Nuk ndihem e sigurt. Maddy vazhdon të më godasë. Nuk më pëlqen kjo,” u kishte thënë “K” oficerëve. “Kur mbërriti policia, viktima kishte kokën ulur, ishte e qartë se ajo ishte jashtëzakonisht i frikësuar” – tha oficeri Alex Pocket.

Ajo u ekzaminua më pas nga mjekët të cilët zbuluan se ishte e kequshqyer, ndërsa një dentist vuri në dukje se ajo kishte vuajtur për vite me radhë nga dhëmbët.

“Nëna jote do të shkojë në burg”

Në janar, Wixon u shpall fajtore nga gjykata për ndalim të paligjshëm, punë të detyruar, sulm dhe shkaktim të lëndimeve trupore. Në atë kohë, ajo u lirua me kusht në pritje të një vendimi për dënimin e saj. Sot, gjykata njoftoi se ajo do të burgoset.

Kur hyri në gjykatë sot për dhënien e dënimit, Wixon i tha të birit: “Mamaja jote do të shkojë në burg”. “K” e ndoqi seancën gjyqësore nëpërmjet një lidhjeje video online.

“Ajo që i ndodhi K-së ende kontrollon një pjesë të madhe të jetës së saj dhe ajo do të jetojë me pasojat e traumës së saj për pjesën tjetër të jetës”, – tha prokurori Sam Jones. Ai më pas vazhdoi të përshkruante abuzimin që ajo duroi. Wixon i derdhte produkte pastrimi në gojë, e shtynte poshtë shkallëve dhe ia fuste kokën në tualet.

Që kur u shpëtua, ‘K’ ka jetuar me një familje kujdestare, ka ndjekur kolegjin dhe ka shkuar me pushime jashtë vendit. Detektija Emma Jackson nga policia e Gloucestershire tha se ajo po “lulëzonte” dhe po jetonte një jetë të shëndetshme.

Në seancën e sotme dëgjimore, u lexua një deklaratë nga nëna kujdestare e K-së, duke rrëfyer vështirësitë që ajo hasi në jetën e saj të re. Fillimisht ajo përshkroi se si luftonte me aktivitetet e përditshme pasi nuk dinte si të dilte jashtë, të kalonte rrugën, të vishej sipas motit.

Ajo ishte privuar nga ushqimi dhe uji për aq kohë sa e kishte të vështirë të kuptonte se nuk kishte nevojë t’i kërkonte leje nënës së saj kujdestare për të bërë një pushim. “Ajo ndjente nevojën për të pastruar gjatë gjithë kohës, nuk mund të relaksohej. Dukej se ishte e vështirë për të.”

25 vjet frikë, kontroll, abuzim

Vetë “K” tha se megjithëse tani jeton me një “familje të mrekullueshme”, ajo “humbi 25 vjet”. Në dëshminë e saj, ajo kishte deklaruar se shpesh ndihej “panik dhe e paralizuar” dhe se zhurmat e forta e frikësonin. “Jetoj me ankth çdo ditë”, vuri në dukje ajo. “Kur pashë Mandy, dridhesha dhe u mërzita. Më duhej të mbrohesha”, tha ajo, ndër të tjera.

Dëshmia e “K”-së u lexua në gjykatë dhe ishte zbuluese për atë që kishte përjetuar. Për 25 vjet, ajo kishte jetuar me “frikë, kontroll dhe abuzim”. “Më trajtuan sikur jeta ime, liria ime dhe zëri im nuk kishin rëndësi. Edhe pse abuzuesi im tani është shpallur fajtor, trauma dhe makthet janë diçka që ende i mbaj me vete çdo ditë”, përshkruan ajo.

“K” shtoi se “dashuria” që po i tregohet tani po e ndihmon “të rindërtojë ngadalë jetën nga e cila ishte privuar” dhe po fillon të ndihet përsëri e sigurt. “Asgjë nuk mund t’i kthejë 25 vitet që humba”, shtoi ajo.

“Por shpresoj që gjykata do ta njohë dëmin e thellë dhe të qëndrueshëm që ka shkaktuar ky abuzim dhe do të japë një dënim që pasqyron vërtet seriozitetin e këtyre krimeve”, theksoi ajo.