Ligji i ri për zyrtarët dhe deputetët: Nuk ka më dhurata! S’keni të drejtë të keni kompani private, as ju dhe as familjarët tuaj

Presidenti Bajram Begaj, ka dekretuar ligjin e ri “Për parandalimin e konfliktit të interesit”, duke i hapur rrugë hyrjes në fuqi të rregullave të reja për transparencën dhe integritetin në funksionet publike.

Ligji vendos kufizime të qarta jo vetëm për zyrtarët e lartë shtetërorë, por edhe për familjarët e tyre, me qëllim shmangien e çdo përfitimi të mundshëm nga pozicioni publik. Në fokus të dispozitave janë funksionarët e lartë kushtetues, anëtarët e Këshillit të Ministrave, deputetët dhe kryebashkiakët.

Sipas përcaktimeve të reja, këta zyrtarë dhe familjarët e tyre nuk do të mund të zotërojnë aksione apo të ushtrojnë veprimtari biznesi që përfitojnë nga pasuria apo fondet e shtetit. Synimi i ligjit është të forcojë ndarjen mes interesit publik dhe atij privat, duke reduktuar hapësirat për abuzim.

Një tjetër pikë e rëndësishme lidhet me ndalimin e pranimit të dhuratave. Vlera maksimale e lejuar është kufizuar në 10 mijë lekë, ndërsa çdo tejkalim i këtij pragu konsiderohet shkelje e ligjit.

Po ashtu, parashikohen rregulla të reja edhe për periudhën pas përfundimit të mandatit. Ish-zyrtarëve u ndalohet të emërohen në pozicione drejtuese në kompani private që kanë pasur lidhje me institucionin ku ata kanë shërbyer, për një afat deri në dy vjet nga largimi nga detyra.