Kush është “njeriu i fortë” i Iranit, që po negocion me amerikanët
Kryetari i parlamentit iranian, Mohammad-Bagher Ghalibaf, thuhet se është personi që luan një rol qendror në bisedimet me Shteteve të Bashkuara. Sipas Axios, që citon një zyrtar izraelit, “vendet ndërmjetësuese po përpiqen të thërrasin një takim midis dy palëve në Islamabad, ku Ghalibaf do të shoqërohet nga zyrtarë të tjerë që përfaqësojnë Teheranin”.
Megjithatë, Teherani këmbëngul se nuk ka pasur kontakte të drejtpërdrejta ose të tërthorta.
Ghalibaf, nga ana e tij, mohoi kategorikisht informacionin në lidhje me bisedimet midis dy palëve: “Populli iranian kërkon ndëshkimin e plotë të sulmuesve. Të gjithë zyrtarët iranianë e mbështesin fuqimisht udhëheqësin e tyre suprem dhe popullin e tyre derisa të arrihet ky qëllim. Nuk janë zhvilluar negociata me SHBA-në dhe lajmet e rreme po përdoren për të manipuluar tregjet financiare dhe të naftës, si dhe për t’i shpëtuar moçalit në të cilin janë bllokuar SHBA-të dhe Izraeli .”
Mohammad-Bagher Ghalibaf, 64 vjeç, si kryetar i parlamentit iranian dhe një veteran i Gardës Revolucionare, është shfaqur javët e fundit si një nga figurat më të rëndësishme politike të vendit pas vrasjes së udhëheqësit suprem dhe zyrtarëve të tjerë të lartë.
Teksa djali dhe pasardhësi i udhëheqësit suprem të vrarë, Mojtaba Khamenei, ende nuk është shfaqur në publik dhe ka lëshuar vetëm 3 deklarata me shkrim, Ghalibaf poston rregullisht në X dhe jep intervista të shumta.
“Jemi në një luftë të pabarabartë, në një marrëveshje asimetrike”, – tha ai në televizionin iranian të mërkurën. Në një postim në X, ai shtoi se pas sulmeve ndaj infrastrukturës energjetike iraniane, “parimi ‘sy për sy’ është në fuqi dhe ka filluar një nivel i ri konfrontimi”.
Megjithatë, ndoshta duke e kuptuar kërcënimin për sigurinë e tij, ai nuk u shfaq publikisht në tubimet e fundit pro-qeveritare javën e kaluar.
I njohur për ambiciet e tij si në fushën ushtarake ashtu edhe në atë politike, Ghalibaf u ngjit me shpejtësi në radhët e ushtrisë pas luftës Iran-Irak (1980-1988). Ai arriti nivelet më të larta të ushtrisë në fund të viteve 1990, kur u bë komandant i forcave hapësinore të sapoformuara të Gardës Revolucionare. Pastaj, në vitin 1999, ai u emërua komandant i policisë kombëtare, mes protestave të paprecedente studentorë.
Ghalibaf ka kandiduar disa herë për president të Iranit, në vitet 2005, 2013 dhe 2024, dhe ka marrë pjesë në garën presidenciale të vitit 2017 përpara se të tërhiqej dhe të mbështeste një tjetër kandidat konservator. Performanca e tij më e mirë zgjedhore erdhi në vitin 2013, kur ai përfundoi i dyti.
Pasi humbi zgjedhjet presidenciale të vitit 2005, ai u zgjodh kryetar bashkie i Teheranit. Gjatë mandatit të tij 12-vjeçar si kryetar bashkie, mbështetësit e tij vlerësuan qasjen e tij teknokratike dhe theksin në menaxhimin mjedisor urban, ndërsa kritikët e tij përmendën akuza për korrupsion.
Grupet e të drejtave të njeriut e kanë akuzuar Ghalibaf se ka luajtur një rol kyç në shtypjen e protestave, nga ato studentore të vitit 1999 dhe Lëvizja e Gjelbër e vitit 2009 deri te demonstratat e fundit që kulmuan në janar 2026.
Ghalibaf u zgjodh kryetar i parlamentit iranian në vitin 2020, duke avokuar herë pas here për reforma ekonomike dhe mbikëqyrje më të fortë parlamentare, ndërkohë që mbeti i lidhur me institucionet kryesore të Republikës Islamike.
“Njeriu më i fuqishëm në Iran është ndoshta tani Ghalibaf”, – tha Aras Azizi, një lektor në Universitetin Yale, duke e përshkruar atë si “një figurë të rrallë, portofoli i të cilit mbulon funksionet ushtarake dhe politike të regjimit”.
“Ai dihet se po drejton përpjekjet luftarake të Iranit”, – tha Azizi, duke shtuar se Ghalibaf është një aleat i Mojtaba Khameneit . “Ai duket se është në një pozicion shumë të favorshëm tani”, shtoi ai.
Ghalibaf parashikoi se lufta do ta riformësonte Lindjen e Mesme, por jo sipas kushteve të Uashingtonit. “Rendi i gjërave këtu do të ndryshojë, por nuk do të jetë një rend në të cilin mbizotëron vullneti i Shteteve të Bashkuara”, – tha ai në një intervistë të regjistruar të transmetuar nga agjencia e lajmeve Tasnim dhe media të tjera.