Kreu i opozitës hungareze akuzon Orbanin se po i thur një ‘skandal seksual në stilin rus’

Kreu i Partisë Tisza, Péter Magyar, ka bërë një deklaratë të gjatë lidhur me supozimin e një fushate shpifjesh me video intime, që sipas tij po përgatitet nga aleatët e qeverisë Orbán përpara zgjedhjeve të prillit.

Magyar tha se ngjarja ndodhi më 2 gusht 2024 gjatë një feste verore të organizuar nga partia, kur u ftua nga ish-partnerja e tij, Vogel Evelin, në një apartament ku ndodheshin persona të tjerë të panjohur për të.

Ai theksoi se nuk kishte konsumuar asnjë lloj droge, duke shtuar se të gjitha testet e kryera më parë kanë rezultuar negative dhe se është i gatshëm t’i nënshtrohet çdo testi të ardhshëm.

“U mashtrova dhe nuk e kuptova se po futesha në një skandal të stilit rus. Ishte një akt seksual konsensual mes dy të rriturish. Nuk kam kryer asnjë veprim të paligjshëm, ndërgjegjja ime është e pastër”, tha Magyar, duke shtuar se nuk dihet se si mund të manipulohet më vonë materiali i regjistruar fshehurazi.

Ai akuzoi qeverinë dhe shërbimet sekrete për presion psikologjik dhe për përpjekje për ta frikësuar para zgjedhjeve, duke thënë se qëllimi ishte të prishte kohën që do të kalonte me djemtë e tij.

“Ata nuk do të arrijnë qëllimin e tyre. Edhe pse ditët e ardhshme do të jenë të vështira për djemtë e mi, ne do t’ia dalim”, tha ai.

Magyar nënvizoi se nuk do të përkulet ndaj shantazhit, duke paralajmëruar se ata që marrin pjesë në këtë skandal “do të përfundojnë përballë sistemit penitenciar hungarez”.

Ai i dërgoi një mesazh të qartë kryeministrit Orbán, duke thënë se “janë vetëm 59 ditë deri në ditën e gjykimit” dhe se shumica e madhe e hungarezëve e shohin qartë korrupsionin dhe gënjeshtrat e qeverisë.

Deklarata e tij shërben si kundërpërgjigje ndaj lajmeve për një video intime të supozuar, duke insistuar se nuk ka konsumuar drogë dhe se nuk do t’i nënshtrohet shantazhit mediatik.