Hakmarrja: Mirela Kumbaro nis shkarkimin nga puna, të njerëzve të Tërmet Peçit

Lufta e “fshehur” mes Mirela Kumbaros dhe Tërmet Peçit ka shpërthyer hapur.

Ish-drejtori i NJVKSH në Gjirokastër, Edi Sinojmeri, ka dalë me një reagim të fortë publik, duke akuzuar drejtpërdrejt drejtuesen politike të qarkut, Mirela Kumbaro, për largimin e tij nga detyra dhe për ushtrim presioni politik.

Sipas Sinojmerit, shkarkimi i tij ka ardhur si pasojë e mbështetjes së hapur që ai i ka dhënë kandidatit të Partia Socialiste e Shqipërisë, Tërmet Peçi, gjatë fushatës elektorale, ku ai ka mbajtur edhe rol koordinues.

Ai pretendon se, pavarësisht rezultateve të larta të arritura në qark – mbi 11,300 vota – është penalizuar për shkak të qëndrimeve të tij të hapura politike.

Në reagimin e tij, Sinojmeri shkon më tej, duke akuzuar se përveç largimit nga detyra, ndaj tij dhe rrethit të tij po ushtrohet presion:

“Po përballem me një realitet presioni dhe veprime që prekin jo vetëm mua, por edhe familjarët dhe bashkëpunëtorët e mi,” shprehet ai.

Ai e konsideron këtë situatë si një devijim nga vlerat e Partia Socialiste e Shqipërisë, duke theksuar se:

“Partia Socialiste nuk është pronë e askujt dhe nuk mund të përdoret për hakmarrje personale.”

Në fund të reagimit, Sinojmeri i bën thirrje të drejtpërdrejtë drejtueses së qarkut që të ndalojë presionin, duke e shoqëruar me mesazhin e qartë: “Hiqni dorë”.

Deklarata e tij ngre pikëpyetje mbi mënyrën e funksionimit të strukturave politike në Gjirokastër dhe mbi raportin mes kontributeve politike dhe vendimmarrjes në nivel lokal.