Emri i tij doli në dosjen “Epstein”, arrestohet vëllai i mbretit të Anglisë

Ish-princi Andrew është arrestuar nën dyshimin për sjellje të keqe në detyrën publike, në një zhvillim të bujshëm që lidhet me hetimet e reja për çështjen Epstein.

BBC raporton se arrestimi u krye herët në mëngjes në Sandringham Estate, rezidenca ku ai jeton aktualisht në Norfolk, pasi u largua nga shtëpia e tij në Windsor.

Sipas policisë, arrestimi vjen pas shqyrtimit të një ankese që pretendon ndarjen e materialeve konfidenciale me Jeffrey Epstein, i dënuar më herët për vepra penale seksuale. Autoritetet konfirmuan se po kryhen kontrolle edhe në adresa në Berkshire dhe Norfolk, ndërsa hetimet janë ende në zhvillim.

“Si pjesë e hetimit, sot kemi arrestuar Andrew nga Norfolku me dyshimin për sjellje të keqe në detyrën publike dhe po kryejmë kërkime në disa adresa. Ai është dërguar në paraburgim dhe operacioni është në vijim,” thuhet në deklaratën zyrtare të policisë.

Ndihmës Shefi i Policisë, Oliver Wright, deklaroi se hetimi është hapur pas një vlerësimi të plotë të pretendimeve.

“Është e rëndësishme të mbrojmë integritetin dhe objektivitetin e hetimit tonë, ndërsa punojmë me partnerët për të shqyrtuar këtë vepër të dyshuar penale. E kuptojmë interesin e konsiderueshëm publik dhe do të ofrojmë përditësime në kohën e duhur,” tha ai.

Kjo është hera e parë që ish-princi arrestohet zyrtarisht, megjithëse ai është përballur më parë me akuza dhe polemika lidhur me lidhjet e tij me Epstein. Andrew, i cili sot mbush 66 vjeç, ka mohuar vazhdimisht dhe me forcë çdo shkelje.