Donald Trump thotë se do të përdorë ‘forcë të paparë’ nëse Irani kundërpërgjigjet

Presidenti i SHBA-ve Donald Trump ka paralajmëruar Iranin të mos kundërpërgjigjet ndaj SHBA-ve dhe Izraelit.

Duke shkruar në platformën e tij Truth Social, ai tha se “Irani sapo deklaroi se do të godasë shumë fort sot, më fort se kurrë më parë”.

“Më mirë të mos e bëjë këtë,sepse nëse e bën, ne do t’i godasim me një forcë që nuk është parë kurrë më parë”.

Deklarata e tij vjen pasi Trupat e Gardës Revolucionare Islamike paralajmëruan se do të sulmonin bazat amerikane dhe Izraelin në hakmarrje për vdekjen e liderit suprem Ali Khameneit.

“Operacioni më shkatërrues ofensiv në historinë e forcave të armatosura të Republikës Islamike të Iranit do të fillojë drejt territoreve të pushtuara dhe bazave terroriste amerikane brenda pak çastesh”, thuhej në deklaratën e tyre disa orë më parë.

Ushtria e Iranit ka paralajmëruar për hakmarrjen “më shkatërruese” pasi sulmet nga SHBA-të dhe Izraeli vranë udhëheqësin suprem të vendit. Shumë gjëra kanë ndodhur në orët e fundit.

Khamnei u vra në zyrën e tij, thotë televizioni shtetëror iranian. Vendi ka shpallur 40 ditë zie për klerikun e linjës së ashpër që ishte në krye të vendit për 37 vjet.

Korpusi i Gardës Revolucionare Islamike paralajmëroi për një “ofensivë shkatërruese” në përgjigje, duke thënë se do të sulmonte bazat amerikane dhe Izraelin.

Sipas kushtetutës, pasardhësi i Khameneit duhet të zgjidhet nga i njëjti organ që e zgjodhi atë: Asambleja e Ekspertëve të Lidershipit.

Ndërkohë, presidenti, kreu i gjyqësorit dhe një klerik anëtar i Këshillit të fuqishëm të Gardës zakonisht do të merrnin përgjegjësitë e tij.

Disa iranianë festuan, ndërsa të tjerë mbajtën zi pas sulmeve dhe konfirmimit të vdekjes së Khameneit.

Vrasja e udhëheqësit suprem është një moment përcaktues në historinë e trazuar të Iranit.

Presidenti Donald Trump më parë tha se Khamenei ishte “një nga njerëzit më të këqij në histori” dhe se vdekja e tij shënoi “shansin më të madh për popullin iranian për të rimarrë vendin e tij”.

Më shumë se 200 njerëz janë vrarë gjatë sulmeve, sipas Gjysmëhënës së Kuqe, dhe CBS News ka raportuar se rreth 40 zyrtarë iranianë janë të vdekur.

Irani ka nisur sulme në të gjithë Lindjen e Mesme, ndaj aleatëve të SHBA-ve dhe aty ku SHBA-të kanë baza ushtarake, duke përfshirë Dubain, Dohan, Bahreinin dhe Kuvajtin.

Katër persona janë plagosur pas një incidenti në Aeroportin Ndërkombëtar të Dubait, një nga qendrat më të ngarkuara të aviacionit në botë, thotë qeveria e vendit.