16 Nëntor, 2026

Katër grupe, një atentat: pazaret e vrasjeve pas ekzekutimit të Vajdin Lamajt

 Katër grupe, një atentat: pazaret e vrasjeve pas ekzekutimit të Vajdin Lamajt

Persona të lidhur me katër grupe kriminale nga Durrësi, Tirana, Vlora dhe Dibra dalin në përgatitjen dhe realizimin e atentatit me eksploziv që vrau Vajdin Lamajn dhe Artan Arsin, më 27 shkurt 2005, në Tiranë. Dëshmia e bashkëpunëtorit të drejtësisë Luftar Reçi përshkruan lidhje mes tyre, ku vrasjet për llogari të njëri-tjetrit shërbenin si monedhë shkëmbimi.

Në këto lidhje përmenden grupi i Durrësit, i drejtuar nga Lulzim Berisha dhe Plaurent Dervishaj, grupi i Emiljano Shullazit në Tiranë, Viktor Bajraktari, i njohur edhe si Viktor Ymeri, me të kaluar në bandën e Gaxhait në Vlorë, si dhe vetë Luftar Reçi nga Dibra. Prokuroria u atribuon të pandehurve role të ndryshme në dy atentatet që po gjykohen në të njëjtën dosje.

Marrëveshja më e qartë në rrëfimin e Reçit lidhet me vrasjen e Klodian Saliut. Sipas tij, Lulzim Berisha i kishte kërkuar të vriste Saliun, duke i premtuar në këmbim eliminimin e një personi me të cilin Reçi kishte konflikt. Pra, një vrasje do të paguhej me një tjetër vrasje.

Këto lidhje u jepnin grupeve mundësinë të siguronin njerëz jashtë qytetit të tyre. Një person që vinte nga një zonë tjetër kishte më pak mundësi të njihej pranë shënjestrës. Sipas rrëfimit të Reçit, bashkëpunimi përfshinte sigurimin e eksplozivit, përgatitjen e tij dhe gjetjen e personave që do të kryenin atentatin.

Në rastin e Vajdin Lamajt, Reçi ka deklaruar se e kishte përgatitur eksplozivin bashkë me Indrit Taullain dhe më pas ia kishte dorëzuar Emiljano Shullazit. Ai ka rrëfyer gjithashtu se Viktor Ymeri i kishte thënë se personin që vendosi bombën e kishte gjetur nga burgu.

Pazarin për shkëmbimin e vrasjeve, Luftar Reçi e ka përshkruar drejtpërdrejt në dëshminë e tij: “Marrëveshja ishte se unë do të ndihmoja në vrasjen e Klodian Saliut dhe ata do të vrisnin hasmin tim”. Sipas tij, kjo marrëveshje ishte bërë me Lulzim Berishën, Plaurent Dervishajn dhe Indrit Taullain, të cilët i takonte në Durrës. Ky rrëfim përshkruan mënyrën se si një grup siguronte ndihmë për eliminimin e kundërshtarit, duke premtuar një tjetër vrasje në këmbim.

Për atentatin ndaj Vajdin Lamajt, Reçi ka rrëfyer edhe një bisedë ku përmendej përfshirja e Viktor Ymerit nga burgu. Sipas dëshmisë së tij, Indrit Taullai ishte shprehur: “Tori ka gjetur njeriun e duhur”. Me emrin Tori, sipas Reçit, i referoheshin Viktor Ymerit, i cili dyshohet se kishte siguruar personin që do të vendoste bombën. Ky është roli që bashkëpunëtori i drejtësisë i atribuon atij në organizimin e atentatit.

Eksplozivi u vendos në ashensorin e pallatit ku banonte Lamaj. Shpërthimi i mori jetën atij dhe mikut të tij, Artan Arsi. Vetëm një ditë më parë, më 26 shkurt 2005, në aksin Durrës–Maminas ishte vrarë Klodian Saliu dhe ishte plagosur Osman Truma.

Por rrëfimi për njerëzit, takimet dhe përgatitjen e bombës nuk jep një shpjegim të qartë për arsyen e eliminimit të Vajdin Lamajt. Në materialet e përshkruara, mbetet e paqartë se cili ishte konflikti që çoi në porositjen e këtij atentati dhe çfarë përfitonte secili nga përfshirja në të.

Për të dyja ngjarjet, SPAK ka kërkuar nga 25 vite burg për Emiljano Shullazin, Viktor Bajraktarin, Indrit Taullain, Lulzim Berishën, Plaurent Dervishajn dhe Indrit Rusin: gjithsej 150 vite. Për Luftar Reçin kërkohen edhe 8 vite burg, duke marrë parasysh bashkëpunimin me drejtësinë. Totali i pretencës është 158 vite burg.

Pretenca është kërkesa e prokurorisë. Gjykata do të vendosë mbi përgjegjësinë e secilit të pandehur, ndërsa të akuzuarit e kanë kundërshtuar dëshminë e Reçit dhe kanë mohuar akuzat.

Leave a Reply

Adresa juaj email s’do të bëhet publike. Fushat e domosdoshme janë shënuar me një *