Intervista e Alice Weidel që i ‘kall datën’ Evropës dhe Ukrainës

Bashkëkryetarja e partisë së djathtë radikale gjermane AfD, Alice Weidel, ka kërkuar që Gjermania të ndërpresë të gjithë ndihmën financiare dhe ushtarake për Ukrainën, ndërsa ka deklaruar se Kievi duhet t’i kthejë Berlinit miliardat e dhëna që prej nisjes së luftës.

Në një intervistë për transmetuesin austriak AUF1, Weidel tha se Ukraina duhet të rikthejë “shuma të konsiderueshme” të parave të dhëna nga Gjermania. Ajo kërkoi gjithashtu që të rinjtë ukrainas në moshë rekrutimi të kthehen në vendin e tyre, duke iu referuar qindra mijëra personave që ndodhen aktualisht në Gjermani.

Nuk është hera e parë që drejtuesja e AfD-së bën një kërkesë të tillë. Në janar, Weidel deklaroi se Ukraina i detyrohet Gjermanisë rreth 70 miliardë euro dhe argumentoi se Kievi duhet të mbulojë edhe kostot e riparimit të gazsjellësit Nord Stream.

Deklaratat e Weidel vijnë vetëm pak ditë pas një përplasjeje të fortë me kancelarin gjerman Friedrich Merz.

Bashkëdrejtuesja e AfD-së kërkoi që Berlini të ndalojë mbështetjen për Ukrainën dhe, duke ndjekur sipas saj shembullin e Washingtonit, të fokusohet te negociatat për paqe. Ajo argumentoi gjithashtu se Gjermanisë i nevojitet “gaz i lirë nga Rusia”.

Kancelari Merz i ka kundërshtuar kategorikisht këto qëndrime.

“Ne e mbështesim Ukrainën dhe do të vazhdojmë ta mbështesim, sepse ajo po mbron edhe lirinë tonë”, është shprehur Merz.

Sipas të dhënave zyrtare të Qeverisë gjermane, që prej pushtimit rus të Ukrainës më 24 shkurt 2022, Gjermania ka ofruar më shumë se 43.3 miliardë euro ndihmë civile dypalëshe, ndërsa rreth 57.6 miliardë euro janë alokuar ose parashikuar për mbështetje ushtarake në vitet e ardhshme. Megjithatë, mbetet e paqartë se sa nga këto fonde kanë mbërritur konkretisht në Ukrainë.

Debati për refugjatët ukrainas

Weidel ka ngritur edhe çështjen e përfitimeve sociale që marrin ukrainasit në Gjermani, duke pretenduar se “më shumë se një milion ukrainas” marrin ndihma sociale.

Megjithatë, kjo shifër rezulton të jetë e ekzagjeruar. Sipas autoriteteve gjermane, në maj të këtij viti në vend ishin të regjistruar rreth 1.17 milionë shtetas ukrainas, ndërsa 652,800 persona, përfshirë fëmijë, merrnin përfitime sociale.

Pavarësisht debatit të ashpër mbi Ukrainën, AfD po forcon pozitat e saj në politikën gjermane. Në zgjedhjet rajonale në Saksoni-Anhalt, partia mori 43.8% të votave, ndërsa sondazhet e fundit e nxjerrin gjithashtu forcën kryesore politike në nivel kombëtar.

Sipas agregimit Wahltrend, bazuar në shtatë sondazhe të zhvilluara nga 20 gushti deri më 8 shtator, AfD kryeson me 28% mbështetje, përpara CDU/CSU me 20.5%, të Gjelbërve me 14.6% dhe SPD-së me 11.5%.

Qëndrimet e Weidel për Ukrainën dhe marrëdhëniet me Rusinë mbeten një nga pikat kryesore të përplasjes mes AfD-së dhe qeverisë së Friedrich Merz, ndërsa rritja e mbështetjes për partinë pritet ta bëjë këtë debat edhe më të rëndësishëm në politikën gjermane.