Netanyahu u paralajmërua para 7 tetorit për sulmin e Hamasit, por nuk njoftoi krerët e sigurisë
Kryeministri izraelit Benjamin Netanyahu mori një paralajmërim të drejtpërdrejtë për një operacion të madh të Hamasit rreth një javë e gjysmë përpara sulmit të 7 tetorit 2023, por nuk ua përcolli atë drejtuesve kryesorë të sigurisë së Izraelit, sipas një investigimi të gjerë të publikuar nga Haaretz.
Sipas investigimit, presidenti i Emirateve të Bashkuara Arabe, Sheikh Mohamed bin Zayed, zhvilloi një bisedë 45-minutëshe me Netanyahun në fund të shtatorit 2023. Gjatë saj, ai paralajmëroi se udhëheqësi i Hamasit në Gaza, Yahya Sinwar, po planifikonte një operacion të madh kundër Izraelit, i cili mund të shkaktonte gjakderdhje dhe të destabilizonte rajonin.
“Emiri shpjegoi se, sipas vlerësimit të tij, Sinwar po përgatitej për një ngjarje të madhe”, tregon një këshilltar i afërt i bin Zayed. “Ai i tha Netanyahut se Izraeli duhej të ishte gati.”
Sipas të njëjtit burim, Netanyahu reagoi qetësisht, duke thënë se besonte se Hamasi synonte të vepronte në Bregun Perëndimor dhe se Izraeli ishte i përgatitur për çdo skenar.
Investigimi pretendon se kreu i Shin Bet-it, kreu i Mossad-it dhe shefi i Shtabit të Forcave të Mbrojtjes të Izraelit nuk u informuan për paralajmërimin e bin Zayed.
Sinjalet, sipas investigimit, kishin nisur edhe më herët. Në shtator 2023, Sinwar i kishte thënë një ndërmjetësi të Fatahut t’u përcillte izraelitëve se po përgatiste një “surprizë të madhe”, duke përdorur fjalën arabe “zilzal” – “tërmet”. Në një takim tjetër, paralajmërimi u bë edhe më i fortë.
“Përcilluni mesazhin se po përgatis nënën e të gjitha surprizave. Një operacion të tmerrshëm. Diçka të jashtëzakonshme”, citohet Sinwar në investigim.
Më 15 shtator, paralajmërimi iu përcoll Shin Bet-it dhe kreu i tij, Ronen Bar, informoi Netanyahun. Më pas u zhvilluan takime sigurie, por investigimi thotë se në diskutimet pasuese kryeministri nuk përmendi paralajmërimet e tjera që kishte marrë.
“Nëse do të kishim ditur për paralajmërimet […] kjo mund të kishte ndryshuar të gjithë panoramën tonë të vlerësimit”, tha një zyrtar i lartë i Shin Bet-it.
Zyra e kryeministrit izraelit i ka mohuar kategorikisht gjetjet e investigimit, duke e quajtur atë “gënjeshtër absolute” dhe duke deklaruar se Netanyahu nuk kishte biseduar me presidentin e Emirateve të Bashkuara Arabe në periudhën në fjalë dhe nuk kishte marrë asnjë paralajmërim prej tij.
Ish-kreu i Shin Bet-it, Ronen Bar, dhe ish-shefi i Shtabit, Herzl Halevi, thanë se nuk ishin informuar për paralajmërimin e pretenduar nga presidenti i Emirateve.