Floriana Garo poston për herë të parë foto me të shoqin

Jo shpesh Floriana Garo, këshilltare e Sali Berishës për mediat, lejon që publiku të shohë momente nga marrëdhënia e saj në çift. Këtë herë, megjithatë, moderatorja ka bërë një përjashtim të vogël, duke publikuar një fotografi ku shfaqet pranë bashkëshortit të saj, Enis Dacit.

Foto është publikuar në Instastory dhe nuk shoqërohet me ndonjë dedikim të gjatë. Një zemër ka mjaftuar për të shprehur momentin, ndërsa ajo që bie më shumë në sy është pikërisht prania e bashkëshortit krah të saj.

Bashkëshorti i Florianës nuk është një figurë që shfaqet shpesh në rrjetet sociale të saj. Ndryshe nga moderatorja, e cila ka një marrëdhënie të drejtpërdrejtë me publikun përmes punës dhe profileve të saj, Enis Daci ka zgjedhur të jetojë më larg vëmendjes mediatike.

Ai është avokat dhe prej vitesh ushtron profesionin në Gjenevë. Ndërkohë, njohja e tij me Florianën ka nisur në një mënyrë që mund të duket e pazakontë për një histori dashurie: përmes LinkedIn.

Ka qenë Enisi ai që ka bërë hapin e parë, duke i shkruar Florianës në platformën profesionale. Bisedat mes tyre vazhduan për disa javë dhe gradualisht krijuan një afrimitet që i shtyu të dy të takoheshin personalisht.

Takimi i parë u zhvillua në Itali dhe duket se ishte pikërisht ai moment që e çoi njohjen e tyre në një tjetër nivel. Marrëdhënia vazhdoi të forcohej dhe, në vitin 2017, çifti u fejua dhe më pas kurorëzoi dashurinë e tyre në martesë.

Pas martesës, Floriana u zhvendos në Gjenevë, ku ndërtoi jetën familjare pranë Enisit. Sot, dyshja është prindër i dy fëmijëve, Adias dhe Priamit.

Pavarësisht viteve që kanë kaluar së bashku, Floriana dhe Enisi kanë ruajtur një profil të ulët sa i përket jetës së tyre private. Daljet e përbashkëta në rrjetet sociale janë të pakta dhe fotografitë e çiftit nuk janë pjesë e shpeshtë e profilit të moderatores.