Itali- 200 euro gjobë për turistët që ecin me rroba banje ose pa bluzë

Varena, një fshat i njohur italian në liqenin e Komos, do të vendosë gjoba deri në 200 euro për turistët që ecin pa bluzë ose vetëm me rroba banje, në një përpjekje për të “ruajtur imazhin” e destinacionit turistik.

Kështu, tani është e ndaluar të ecësh nëpër fshat pa veshur këmishë ose thjesht me rroba banje, rroba që janë të rezervuara rreptësisht për plazhet pranë liqenit ose për udhëtime me varkë në Komo. Masa të tjera po merren gjithashtu për të kufizuar mbiturizmin, duke i zvogëluar grupet e vizitorëve në një maksimum prej 25 personash, ndërsa guidave turistike u është ndaluar përdorimi i altoparlantëve.

 “Varena është një fshat i mrekullueshëm dhe ne jemi krenarë që mirëpresim qindra mijëra vizitorë nga e gjithë bota çdo vit. Megjithatë, cilësia e jetës së banorëve tanë nuk mund të sakrifikohet në altarin e turizmit masiv”, ”, tha kryebashkiaku i Varenës, Mauro Manzoni.

Rregullat kanë qenë në fuqi prej disa ditësh dhe duket se janë miratuar gjerësisht nga ata që jetojnë në Varena, veçanërisht kodi i veshjes.

“Në plazh mund të bësh çfarë të duash, por kur ecën dhe shkon në dyqane, restorante, kisha ose shesh, duhet të vishesh mirë”, tha një pronar dyqani.