“Është si furrë”: Vala e të nxehtit nxjerr në pah pabarazinë klimatike në Francë

Miliona banorë në Francë po përballen me temperatura rekord, ndërsa vala e të nxehtit ka nxjerrë në pah një problem në rritje: pabarazinë klimatike dhe banesat e papërshtatshme për kushtet ekstreme të motit.

Më shumë se 44 milionë njerëz, nga një popullsi prej 67 milionë banorësh, kanë qenë nën nivelin më të lartë të alarmit për vapën, me temperatura që kanë kaluar 40 gradë Celsius në shumë zona të vendit.

Temperaturat e larta gjatë natës kanë vështirësuar më tej jetesën, veçanërisht për familjet që banojnë në apartamente të vjetra dhe të paizoluara.

Banorë të lagjeve periferike pranë Parisit tregojnë se apartamentet e tyre janë kthyer në “furra”, ku temperatura brenda arrin deri në 40 gradë Celsius. Shumë prej tyre nuk kanë kondicionerë, nuk mund të përballojnë kostot e energjisë elektrike për ventilatorët dhe vuajnë nga mungesa e hapësirave të gjelbra.

Vala e të nxehtit ka sjellë gjithashtu mbylljen e rreth 1.800 shkollave, rritje të ndotjes së ajrit, shtim të shtrimeve në spitale dhe ndërprerje të energjisë elektrike në mijëra banesa.

Sipas një raporti të fundit të Fondacionit për Strehimin në Francë, rreth gjysma e banesave franceze nuk ofrojnë mbrojtje të mjaftueshme ndaj temperaturave të larta. Organizatat që merren me çështjet klimatike paralajmërojnë se familjet me të ardhura të ulëta po goditen më fort nga valët e të nxehtit, duke thelluar pabarazitë sociale dhe ekonomike.

Ekspertët theksojnë se një pjesë e madhe e ndërtesave dhe infrastrukturës franceze janë projektuar për të përballuar të ftohtin dhe jo vapën ekstreme, duke e bërë Francën një nga vendet evropiane më të ekspozuara ndaj pasojave të ndryshimeve klimatike.