Djali i princeshës së Kurorës norvegjeze dënohet me 4 vite burg për përdhunim
Marius Borg Høiby, djali 29-vjeçar i Princeshës së Kurorës Mette-Marit, është shpallur fajtor për dy akuza për përdhunim dhe është dënuar me katër vite burg nga Gjykata e Qarkut në Oslo.
Trupi gjykues e shpalli fajtor Høiby për dy raste përdhunimi, ndërsa e liroi nga përgjegjësia penale për dy akuza të tjera të ngjashme. Vendimi u dha të hënën pas një procesi gjyqësor që ka tërhequr vëmendje të madhe në Norvegji dhe ka hedhur hije mbi familjen mbretërore.
Prokuroria kishte kërkuar një dënim prej shtatë vitesh e shtatë muajsh burg, ndërsa mbrojtja kishte argumentuar se një dënim prej 18 muajsh do të ishte i mjaftueshëm. Avokatët e Høiby kanë të drejtë të apelojnë vendimin.
Megjithëse nuk është anëtar i familjes mbretërore, Høiby u rrit pranë saj pasi nëna e tij u martua me Princin e Kurorës Haakon kur ai ishte vetëm katër vjeç.
Gjykata konstatoi se ai kishte përdhunuar dy gra, njëra prej tyre në pronën mbretërore në Skaugum në vitin 2018 dhe tjetra në Oslo në vitin 2024. Sipas gjykatës, viktimat kanë qenë në gjumë ose të paafta për të kundërshtuar në momentin e ngjarjeve.
Përveç akuzave për përdhunim, Høiby u shpall fajtor edhe për dhunë ndaj ish-partneres së tij, influencueses norvegjeze Nora Haukland, si dhe për shkaktimin e lëndimeve të rënda ndaj një tjetër partnereje.
Nga ana tjetër, ai u shpall i pafajshëm për dy akuza të tjera për përdhunim që lidhen me ngjarje të ndodhura në Oslo dhe në ishujt Lofoten.
Gjykata urdhëroi gjithashtu që Høiby të paguajë rreth 640 mijë korona norvegjeze (rreth 57 mijë euro) si kompensim për katër prej grave të përfshira në çështje.
Rasti ka marrë një dimension të veçantë publik për shkak të lidhjes së Høiby me familjen mbretërore norvegjeze. Situata është bërë edhe më e ndjeshme pasi Princesha e Kurorës Mette-Marit vuan nga fibrozë pulmonare dhe së fundmi është vendosur në listën e pritjes për transplant të mushkërive.
Ekspertët e komunikimit dhe vëzhguesit e familjes mbretërore e kanë cilësuar çështjen si një krizë serioze institucionale për monarkinë norvegjeze, megjithëse vëmendja e publikut është përqendruar gjithnjë e më shumë te gjendja shëndetësore e princeshës.