Koreja e Veriut prezanton raketa të drejtuara nga inteligjenca artificiale, mund të godasin deri në 100 km larg

Koreja e Veriut ka zhvilluar një seri të re testesh ushtarake që përfshijnë raketa balistike taktike, sisteme artilerie me rreze të gjatë dhe raketa lundruese të drejtuara nga inteligjenca artificiale, nën mbikëqyrjen e liderit Kim Jong Un.

Lajmi u bë publik nga agjencia shtetërore koreano-veriore KCNA, e cila tha se testimet kishin për qëllim vlerësimin e performancës luftarake të sistemeve të reja të armëve të projektuara për luftën moderne.

Sipas raportimit, ushtrimet përfshinë testimin e një “koke luftarake për misione speciale” të montuar në raketa balistike taktike, verifikimin e besueshmërisë së sistemeve të raketave me shumë lëshues me rreze të gjatë dhe saktësinë e raketave taktike lundruese të asistuara nga inteligjenca artificiale.

KCNA raportoi se testet synonin gjithashtu të verifikonin sisteme të automatizuara të lëshimit, të modernizuara për të përmirësuar reagimin në fushën e betejës dhe efektivitetin operacional.

Kim Jong Un deklaroi se ushtrimet treguan se sistemet e armëve të Koresë së Veriut janë modernizuar me sukses “për t’iu përshtatur kushteve të luftës moderne dhe për të rritur përdorimin e tyre në betejë”, raportoi media shtetërore.

Sipas pretendimeve të Phenian-it, raketat e reja janë të pajisura me sisteme navigimi preciz dhe udhëzimi të bazuara në inteligjencë artificiale, të afta për të goditur objektiva deri në 100 kilometra largësi.