Evropa trembet: Putini mund të testojë NATO-n
Frika se Rusia mund të zgjerojë luftën përtej Ukrainës dhe të testojë kohezionin e NATO-s po rritet në kryeqytetet evropiane, ndërsa disa zyrtarë të sigurisë paralajmërojnë se presidenti rus Vladimir Putin mund të kërkojë një përshkallëzim të ri brenda 12 muajve të ardhshëm.
Sipas një raportimi të Wall Street Journal, shqetësimet lidhen me mundësinë që Rusia të synojë një nga vendet baltike, ishuj suedezë apo danezë në Detin Baltik, ose territore të NATO-s në Arktik – një lëvizje që do të testonte drejtpërdrejt nenin e mbrojtjes kolektive të Aleancës.
Në sfond të këtyre shqetësimeve qëndrojnë edhe sinjalet nga presidenti i Shteteve të Bashkuara, Donald Trump, për një reduktim të angazhimit amerikan në NATO dhe uljen e pranisë ushtarake amerikane në Evropë, faktorë që sipas zyrtarëve evropianë mund të perceptohen nga Kremlini si një mundësi strategjike.
Megjithatë, inteligjenca evropiane dhe burime ushtarake theksojnë se nuk ka ende prova konkrete se Rusia po zhvendos trupa apo pajisje për të përgatitur një sulm ndaj vendeve baltike ose territoreve të tjera jashtë Ukrainës.
Një faktor tjetër shqetësues lidhet me situatën në frontin ukrainas.
Sipas vlerësimeve të inteligjencës perëndimore, Rusia po humbet rreth 35 mijë ushtarë në muaj, një ritëm që sipas raportit po e tejkalon aftësinë e Kremlinit për të rekrutuar forca të reja. Kjo mund ta vendosë Putinin përballë nevojës për mobilizim të detyruar – një vendim politikisht i ndjeshëm brenda Rusisë.
“Nëse mobilizon vetëm për këtë luftë, atëherë po dërgon sinjalin se nuk po fiton realisht. Dhe aty vjen momenti kur mund të ketë nevojë për përshkallëzim për ta justifikuar mobilizimin”, tha Përfaqësuesja e Lartë e Bashkimit Evropian për Politikën e Jashtme, Kaja Kallas. “Ky është një moment shumë i rrezikshëm.”
Nga ana tjetër, disa ekspertë mbeten skeptikë për një aventurë të re ushtarake ruse. Deputeti i lartë gjerman Norbert Röttgen argumentoi se zgjerimi i luftës drejt NATO-s do të ishte një rrezik i madh për Putinin, sidomos pasi Moska nuk ka arritur suksesin e pritur në Ukrainë.
Ndërkohë, Polonia ka paralajmëruar se një sulm rus ndaj NATO-s mund të ndodhë “brenda muajsh, jo vitesh”, ndërsa Gjermania ka miratuar strategjinë e saj të parë ushtarake, duke e identifikuar zyrtarisht Rusinë si kërcënimin kryesor të sigurisë në Evropë.