Spindoktorët e Kremlinit përgatiten për një humbje në Ukrainë

Kremlini po përgatit opinionin publik rus për një “fitore” që në thelb do të ishte pranimi i kufijve të dështimit në Ukrainë.

Kështu shkruan një analizë e publikuar nga Guillaume Lancereau, bazuar në një dokument të brendshëm të administratës presidenciale ruse, i zbuluar nga media investigative ruse Dos’e.

Dokumenti, i hartuar nga ekipi i Sergei Kirienkos, zëvendësdrejtor i administratës presidenciale të Vladimir Putinit, përshkruan strategjinë propagandistike që do të përdoret nëse Moska arrin një marrëveshje paqeje me Ukrainën.

Sipas analizës, Kremlini pranon në mënyrë indirekte se objektivat maksimaliste të fillimit të luftës nuk janë më realistë. Në dokument thuhet se Rusia duhet “të dijë kur të ndalet”, pasi vazhdimi i luftës së konsumimit mund ta çojë vendin drejt kolapsit ekonomik dhe social. Madje përdoret edhe termi “fitore pirrike”, për të paralajmëruar se këmbëngulja ushtarake mund të kushtojë më shumë sesa përfitimet territoriale.

Në skenarin që konsiderohet “më i mundshëm”, Rusia do të mbante Donetskun, Luhanskun dhe pjesë të rajoneve Kherson e Zaporizhzhia deri në vijën aktuale të frontit, ndërsa trupat ruse do të tërhiqeshin nga Sumy dhe Kharkivi.

Dokumenti tregon gjithashtu se propaganda ruse po përgatitet të ndryshojë narrativën e luftës. Kremlini synon t’ua paraqesë rusëve marrëveshjen si një “fitore historike” të Vladimir Putinit ndaj Perëndimit dhe “globalizmit”, edhe pse pranohet se nuk do të ketë kapitullim të Ukrainës dhe as “marrje të Kievit”. Në tekst thuhet se “marrja e Kievit nuk ka qenë kurrë objektiv”, pavarësisht se slogani “Kievi për tre ditë” u bë simbol i pushtimit rus në vitin 2022.

Një pjesë e madhe e dokumentit fokusohet te menaxhimi i opinionit publik. Strategët e Kremlinit i ndajnë rusët në kategori problematike: ultranacionalistët, veteranët, punonjësit e industrisë ushtarake dhe qytetarët e lodhur nga lufta.

Për ultrapatriotët propozohet kufizimi i zërit të tyre në media dhe “racionalizimi” i idesë se ky është momenti i duhur për ta ndalur luftën. Për veteranët parashikohen projekte sociale, integrim politik dhe madje rekrutim për misione të reja në “Africa Corps”, formacioni rus që operon në Afrikë.

Ndërkohë, për qytetarët e zakonshëm premtohet “rikthim në jetën normale”: hapje aeroportesh, heqje sanksionesh, rifillim tregtie dhe rikthim i stabilitetit ekonomik.

Dokumenti zbulon edhe frikën e elitës ruse nga pasojat e brendshme të luftës. Autorët paralajmërojnë për rreziqe ekonomike, demografike dhe sociale në rast të vazhdimit të konfliktit, përfshirë mobilizim të përgjithshëm, rritje taksash, inflacion dhe humbje të mëtejshme njerëzore.

Në një pjesë tjetër thuhet se fjala “paqe”, e kriminalizuar në Rusi gjatë viteve të luftës, duhet të rehabilitohet gradualisht. Madje propozohet rikthimi i humorit në jetën politike dhe një “shkrirje e kontrolluar”, e ngjashme me periudhën sovjetike të viteve ’60 pas Stalinit.

Sipas analizës, dokumenti tregon se Kremlini nuk funksionon mbi ndonjë ideologji të thellë, por mbi një seri teknikash propagandistike dhe formulash komunikimi që synojnë të bindin çdo segment të shoqërisë se rezultati i luftës është fitore.

Megjithatë, mbetet e paqartë nëse vetë Vladimir Putin është gati të pranojë një kompromis të tillë. Sipas autorit, ndërsa komunikuesit e Kremlinit po përgatisin terrenin për ndalimin e luftës, drejtuesit ushtarakë vazhdojnë t’i premtojnë Putinit se mund të pushtojnë të gjithë Donbasin deri në vitin 2026.