“Ç’punë kam unë?” – Zbulohet pse u thirr në SPAK, Tërmet Peçi

Deputeti i Partisë Socialiste dhe ish-kryebashkiaku i Tepelenës, Tërmet Peçi, është paraqitur pasditen e 20 majit në ambientet e Prokurorisë së Posaçme (SPAK), ku ka qëndruar për rreth dy orë.

Sipas gazetares Anila Hoxha, SPAK e ka pyetur deputetin socialist Tërmet Peçi për një hetim të hapur për kohën kur ai ka drejtuar bashkinë e Tepelenës.

Burimet e gazetares së Top Channel konfirmuan se kësaj radhe deputeti ishte pyetur për një kontratë për një kullotë të dhënë me qera nga këshilli bashkiak i qytetit.

Procedura për të cilën ish-kryebashkiaku u pyet lidhej me dhënien me qera për 99 vjet të një sipërfaqeje prej mbi një hektar që ishte mbjellë me pemë arrore dhe që rezultonte tokë kullotë.

Më herët Tërmet Peçi ishte pyetur si deklarues edhe për mënyrën se si është privatizuar ish-pallati i pionierëve në këtë qytet, kallëzuar nga njëri prej pronarëve të objektit.

Por në cilësinë e deklaruesit, burimet shpjeguan për TCH se deputeti Peçi ka këmbëngulur se nuk mund të mbajë përgjegjësi për dokumente që janë sigluar në 1986.