WSJ: Rusia furnizon Iranin me inteligjencë dhe dronë për të goditur forcat amerikane

Rusia po rrit mbështetjen e saj ushtarake dhe të inteligjencës për Iranin, duke i furnizuar Teheranit imazhe satelitore dhe teknologji të avancuar dronësh për të ndihmuar në shënjestrimin e forcave amerikane në rajon, raporton Wall Street Journal duke cituar burime me dijeni për çështjen.

Sipas raportimit të gazetës, Moska synon të mbajë aleatin e saj kyç në Lindjen e Mesme të angazhuar kundër forcave amerikane dhe izraelite.

“Qëllimi është zgjatja e konfliktit, i cili i sjell Rusisë avantazhe si ushtarake ashtu edhe ekonomike”, citohet në raportim.

Mbështetja përfshin komponentë të përmirësuar për dronët Shahed, të cilët rrisin aftësitë e komunikimit, navigimit dhe goditjes.

“Përmirësimet synojnë të rrisin saktësinë dhe efektivitetin e operacioneve”, thanë burimet.

Duke u bazuar në përvojën e saj në Ukrainë, Rusia po ofron edhe këshilla taktike për përdorimin e dronëve. Një zyrtar i lartë evropian i inteligjencës theksoi se “rekomandimet përfshijnë numrin optimal të dronëve dhe lartësinë më efektive të fluturimit”.

Gjithashtu, Moska ka ndarë me Iranin informacione mbi vendndodhjen e forcave amerikane dhe aleate në Lindjen e Mesme.

“Në fazat e hershme të konfliktit, Rusia ka furnizuar drejtpërdrejt imazhe satelitore”, konfirmuan një zyrtar evropian dhe një diplomat nga Lindja e Mesme.

Analistët vlerësojnë se kjo mbështetje pasqyron modelin e ndihmës që SHBA dhe partnerët evropianë i kanë dhënë Ukrainës vitet e fundit.

Në rajonin e Gjirit, ndihma ruse besohet se ka ndihmuar Iranin të kryejë sulme ndaj objekteve amerikane, përfshirë një radar paralajmërues të lidhur me sistemin THAAD në Jordani, si dhe objektiva të tjera në Bahrein, Kuvajt dhe Oman.