Raketa izraelite që po godet Iranin nga 300 km larg

Operacionet ushtarake të Izraelit kundër Iranit kanë nxjerrë në pah një sërë armësh të avancuara me rreze të gjatë që përdoren nga Forcat Ajrore izraelite për të goditur objektiva në thellësi të territorit iranian.

Sipas raportimeve të mediave izraelite, dy nga sistemet më të përmendura në sulmet e fundit janë raketa ajër-tokë Rampage dhe Ice Breaker, të zhvilluara nga industria e mbrojtjes së Izraelit.

Raketa Rampage, e zhvilluar në bashkëpunim nga kompanitë izraelite Elbit Systems, Israel Aerospace Industries dhe Tomer, është projektuar për goditje me precizion të lartë nga distanca të mëdha.

Ajo mund të përdoret nga avionët luftarakë për të goditur objektiva tokësore nga një distancë prej rreth 150 deri në 250 kilometra, duke ulur rrezikun për pilotët që operojnë në zona të mbrojtura nga sistemet kundërajrore.

Një tjetër armë që po përdoret në sulmet ndaj objektivave në Iran është Ice Breaker, një raketë e prodhuar nga kompania Rafael. Kjo raketë ka një rreze veprimi deri në rreth 300 kilometra dhe mund të përdoret kundër objektivave tokësore dhe detare.

Sipas përshkrimeve të industrisë së mbrojtjes, Ice Breaker është projektuar për të operuar në të gjitha kushtet e motit dhe për të funksionuar edhe në mjedise me intensitet të lartë të luftës elektronike.

Sistemi i saj i navigimit dhe drejtimit përdor sensorë infra të kuq dhe algoritme të inteligjencës artificiale për identifikimin dhe goditjen e objektivave.