Trump shpall “kthesën e shekullit”, në fjalimin më të gjatë të State of the Union
Presidenti i SHBA-ve, Donald Trump, mbajti fjalimin më të gjatë në historinë e State of the Union, duke e cilësuar vitin e tij të parë në mandatin e dytë si një “transformim si kurrë më parë” dhe një “kthesë për epokat”.
Duke folur për gati dy orë para një sesioni të përbashkët të Kongresit, Trump mbrojti bilancin e administratës së tij dhe pretendoi se ka rindërtuar një vend që, sipas tij, ishte dëmtuar nga paraardhësi i tij, Joe Biden.
“Nuk do të kthehemi më pas”, deklaroi ai me ton triumfues.
Sondazhe të dobëta, optimizëm i fortë
Fjalimi vjen në një moment kur presidenti përballet me vlerësime të ulëta publike.
Një sondazh i fundit Washington Post–ABC News–Ipsos tregon se vetëm 39% e votuesve e vlerësojnë pozitivisht presidencën e tij, ndërsa ai mbetet “nën ujë” në çështje kyçe si ekonomia dhe emigracioni.
Megjithatë, Trump nuk i përmendi sondazhet, duke zgjedhur të rendisë ato që i quajti arritje të mëdha të administratës.
Ai njoftoi se zëvendëspresidenti JD Vance do të udhëheqë një “luftë kundër mashtrimit”, si dhe foli për një marrëveshje për “mbrojtjen e paguesve të energjisë” për të zbutur ndikimin e qendrave të reja të të dhënave në faturat e energjisë elektrike.
Polemika dhe përplasje në sallë
Fjalimi u shoqërua me tensione të forta politike. Disa demokratë u larguan nga salla, të tjerë mbajtën pankarta dhe refuzuan të duartrokasin.
Në disa momente pati ndërhyrje verbale nga ligjvënësit opozitarë.
Presidenti sulmoi ashpër demokratët, duke i quajtur “të çmendur”, dhe përdori retorikë të fortë për çështjen e emigracionit, duke iu referuar emigrantëve somalezë si “piratë që plaçkitën Minnesota-n”.
Në fjalim ishin të pranishëm edhe katër gjyqtarë të Gjykatës Supreme, përfshirë John Roberts, Amy Coney Barrett dhe Elena Kagan, të cilët së fundmi kishin firmosur një opinion që kufizon përdorimin e kompetencave ekzekutive për vendosjen e tarifave tregtare.
Trump e cilësoi vendimin “të pafat” dhe “zhgënjyes”, por me ton më të përmbajtur se ndaj kundërshtarëve politikë.
Çështja e Iranit dhe politika e jashtme
Sa i përket Iranit, presidenti – i cili ka urdhëruar rritje të pranisë ushtarake amerikane në rajon – tha se preferon zgjidhje diplomatike, por theksoi: “Nuk do ta lejoj kurrë sponsorin numër një të terrorizmit në botë të ketë armë bërthamore”.
Ai përmendi gjithashtu lirimin e pengjeve izraelite nga Hamasi dhe mbështeti një propozim për ndalimin e tregtimit të aksioneve nga ligjvënësit, një çështje me mbështetje dypartiake.
Në fund të fjalimit, Trump nderoi disa qytetarë amerikanë të pranishëm në galeri, përfshirë anëtarë të ekipit amerikan të hokejit që fituan medalje ari në Lojërat Olimpike Dimërore, si dhe një veteran të Luftës së Koresë, të cilit iu akordua Medalja e Nderit.
Fjalimi konfirmoi thellimin e ndarjeve politike të thella në Washington, në një vit elektoral që pritet të përcaktojë balancat e pushtetit në Kongres.