Burgjet e famshme që sot janë hotele luksoze

Me “salvaged stays” – ose ndërtesa historike të rikthyera në hotele që po renditen mes trendeve kryesore të udhëtimit për vitin 2026, disa nga burgjet më famëkeqe të botës po gjejnë një jetë të re si prona luksoze.

Me dhoma të vogla dhe ushqim jo fort tërheqës, burgjet nuk kanë qenë kurrë sinonim i pushimeve komode. Por sot, nga një qeli e epokës osmane te ndërtesa të ndërtuara për të mbajtur revolucionarë, këto hapësira po riformësohen në destinacione pesë yje.

Në Japoni, një pronë e re e Hoshino Resorts pritet të hapet në qershor në ambientet e ish-Burgut për të Mitur të Narës. E ndërtuar në vitin 1908 gjatë periudhës Meiji, ndërtesa funksionoi si burg deri në vitin 2017, kur u mbyll dhe u shpall Pronë Kulturore me Rëndësi Kombëtare.

Marka japoneze ka ruajtur fasadën prej tullash të kuqe dhe strukturën e brendshme metalike, duke shmangur ndjesinë e ngushtësisë. Hoteli do të jetë vetëm me suita: nga nëntë deri në 11 qeli të vjetra janë bashkuar për të krijuar secilën nga 48 dhomat, ndërsa krahu i ndalimit do të shndërrohet në një restorant japonezo-francez.

Në prill hapet edhe Muzeu i Burgut të Narës, ku vizitorët mund të mësojnë për historinë dhe arkitekturën e institucionit. Zona përreth ofron Parkun e Narës me drerë të lirë dhe tempuj të famshëm, përfshirë Todai-ji, pjesë e Trashëgimisë Botërore të UNESCO-s.

Stamboll: Nga burg për disidentë në Four Seasons

Four Seasons Hotel Istanbul At Sultanahmet u ndërtua në vitin 1918 në stilin neoklasik turk nga Mimar Kemaleddin Bey dhe shërbeu si burg deri në vitin 1969, kryesisht për disidentë intelektualë si shkrimtarë e gazetarë. Shumë vepra të rëndësishme të letërsisë turke u shkruan këtu.

Pas një rikthimi të shkurtër si burg në vitet 1980, ndërtesa u rinovua dhe u rihap si hotel në vitin 1996. Sot, përveç disa elementeve të ruajtura prej mermeri dhe guri, prona nuk i ngjan më një burgu: ka 65 dhoma dhe suita të bollshme me pamje nga Bosfori, spa tradicionale me hamam dhe disa restorante e bare. Vendndodhja në lagjen Sultanahmet e vendos hotelin pranë Hagia Sofisë dhe Pallatit Topkapi.

Gjermani: Hotel Liberty në Offenburg

Hotel Liberty daton nga vitet 1840 dhe “mysafirët” e tij të parë ishin të burgosur politikë nga Revolucioni i dështuar i Badenit më 1848. I rihapur si hotel në vitin 2017, arkitekti Jurgen Grossmann lidhi dy krahët e vjetër me një kub xhami që sot shërben si recepsion.

Referencat ndaj së kaluarës janë të pranishme kudo: dyert e qelive varen pranë secilës nga 38 suitat, ndërsa restoranti quhet Wasser&Brot – “ujë dhe bukë” – duke iu referuar dietës tipike të të burgosurve. Offenburg është gjithashtu një portë hyrëse për në Pyllin e Zi të Gjermanisë, ideal për ecje dhe shëtitje në natyrë.

SHBA: Charles Street Jail

I hapur në vitin 1851, Charles Street Jail u projektua me një atrium të ndriçuar dhe dritare harkore që sillnin dritë natyrale. Pas mbylljes në vitin 1990, ndërtesa u shndërrua në hotel dhe u hap në vitin 2007 si The Liberty. Sot, atriumi i ndriçuar është një nga tiparet kryesore të pronës.

Disa elemente historike, si hekurat e dritareve dhe qelitë e ruajtura brenda restorantit, i kujtojnë vizitorit të kaluarën. Edhe emrat e lokaleve luajnë me këtë histori, si bari “Alibi” i vendosur në ish-qelinë e të dehurve. Hoteli ndodhet në lagjen historike Beacon Hill, pranë Charles River Esplanade dhe Boston Common.

Australi: The Interlude në ish-burgun Pentridge

Pentridge Prison, dikur shtëpia e kriminelëve famëkeqë, ka kaluar një transformim të madh gjatë dekadës së fundit. I përdorur si burg nga viti 1851 deri më 1997, sot kompleksi ka restorante, bare, kinema dhe madje edhe ambiente për dasma.

Divizioni B është shndërruar në The Interlude, një hotel butik me vetëm 19 suita. Për secilën suitë janë bashkuar katër ose pesë qeli, duke ruajtur gurin origjinal dhe duke shtuar komoditete moderne. Hoteli e quan veten “streha e parë urbane e mirëqenies në botë e ndërtuar në një burg të konvertuar”, me një pishinë nëntokësore si pikë qendrore.

Vizitorët mund të mësojnë për historinë e vendit përmes tureve në Divizionin H. Përpara hapjes, një plak i komunitetit Wurundjeri kreu një ceremoni pastrimi, pasi Pentridge ishte ndërtuar në një zonë të shenjtë për këtë popull.